NAGPAHAYAG sa ilang hiniusang kaandam ang nagkadaiyang sektor sa Davao City aron masiguro nga han-ay ug hapsay ang pagahimuon nga Palarong Pambansa sugod Abril 27, 2019 hangtud Mayo 4, 2019.
Kini ang gibutyag ni Jenelito Atillo, ang tigpamaba sa Department of Education (DepEd)-Davao nga karon halos tanang mga delegado nangabot na.
“Base sa atong pag-monitor, moabot sa kapin kun kulang 20 mil ka mga delegado ang anaa na sa atong siyudad, diin ang tanang sektor nga molambigit sa Palaro, andam na,” sulti ni Atillo.
Gibutyag ni Ret. Lt. Col. Angel Sumagaysay, deputy head sa Public Safety & Security Command Center, nga andam na ang tanan, gani mokabat sa sobra 3,500 ka mga sakop sa otoridad ang magtinabangay kada-adlaw para masiguro ang kahusay ug kalinaw sa aktibidad.
Gipaklaro nga ang opening ceremony pagahimuon na sa Dominggo sa hapon sa sama gihapon nga lugar sa Mintal ning dakbayan.
Gisiguro usab sa Davao City Police Office ang seguridad sa mga lugar kung asa nagatulog ang mga atleta.
Gibutyag ni Police Capt. Maria Therisita Plaza-Gaspan, tigpamaba sa DCPO, nga duha ka team nga gilangkuban sa duha ka opisyal ang nakabutang sa matag lugar nga pahulayan ug tuluganan sa mga atleta.
Igmat sab nga nag-monitor sa palibot ang kasundalohan ilabi na ang Eastern Mindanao Command (Eastmincom) sa pagseguro nga hapsay ang seguridad sa palibot sa siyudad sa Davao atol sa maong kaugdahan. (Richy F. Nalagon)