ANGOL ang usa ka atleta sa Palarong Pambansa human giingon naparok ang ulo sa semento ug duna pa’y laing usa ang nagpabilin sa ospital.
Sa report gikan sa kapulisan sa Calinan Police Station, ang biktima nailhang si alyas Dafnie, 17-anyos ug tinun-an sa Special Education (SPED) ug partisipante sa special blind running event gikan sa Northern Mindanao.
Nasayran nga nagsakay ang biktima sa school bus ug sa pag-abot niini sa Calinan Central Elementary School, nanganaug ang mga sakay ug aksidenteng nahulog si Dafnie sa gamay nga kanal duol sa gate.
Daling gidala ang biktima sa Southern Philippines Medical Center (SPMC) kinsa gilayon sab kining migawas.
Sa laing bahin, usa sab ka atleta ang gidala sa ospital human giingong gipanakitan og lawas hinungdan nga di kaayo kini kalihok.
Alas 8:30 sa gabii, Martes ang si Patrolman Zinjie Butaya Mutia nga nakadestino sa Calinan Central Elementary School mipahibalo nga ang usa ka atleta gikan Baloi National High School sa Lanao Del Norte nga si Key (bansagon gitago), 17-anyos, magdudula sa wushu, ang nakasinati og pagpanakit sa kalawasan nga maoy hinungdan nga di na gyud niya malihok pag-ayo iyang lawas.
Gitambalan na ang maong atleta sa mga doktor sa SPMC diin ang mga ahensya nga dunay kalambigitan sa Palarong Pambansa maoy nangunay sa pag-asikaso sa biktima. (Richy F. Nalagon)