BRAULIO E. DUJALI, Davao del Norte -- Wala nay kinabuhi nga nakit-an ang usa ka 56-anyos nga lalaki human gituohang nalumos samtang nangisda sa Barangay Tanglaw.
Sa report gikan sa Braulio E. Dujali Municipal Police Station, ang biktima nailhang si Rogelio Polinar, nagpuyo sa maong barangay.
Giingon nga posibleng gibugkos sa tiil sa biktima ang pukot ug nabira ang pukot sa kusog nga bul-og sa tubig hinungdan nga nahulog ang biktima ug nalumos.
Dihang nabangalan ang biktima nabalot na kini sa iyang pukot.
Sumala sa kapuyo, dunay balatian nga altapresyon ang biktima nga mao sab ang gitan-aw nga hinungdan sa hitabo, ang pag-kaatake niini.
Ang kapulisan nagtambag sa kabanay sa biktima nga ipailawom sa autopsy ang patay nga lawas aron masayran pa gayod ang tinuod nga hinungdan sa kamatayon niini. (Richy F. Nalagon)