Duna nay gidakop sa ambush sa 2 ka mga gwardya; motibo gisusi pa: Pulis

VILLABA, Leyte - Duna nay person of interest ang kapulisan ning lungsod sa pag ambush patay sa duha ka mga gwardya sa Palompon Sub Provincial Jail, alas 4 pasado sa hapon, Martes, Abril 16, 2019.

Ang duha ka gwardya nga sila si Leo Gonzales, taga Tabango Leyte ug Genesis Piamonte, San Isidro, Leyte gikan sa Villaba uban ang lima ka mga inmate sakay sa usa ka traysikol sa dihang nahitabo ang pag ambush.

Matod ni Patrolman Glen Ian Belongilot, imbestigador, nisulti kanila ang pamilya ni Piamonte nga usa ka Mario Arpon ang dunay personal nga kasuko kang Piamonte.

Sa pagkahibawo sa kapulisan, ilang gisusi ang maong tawo ug ilang nasayran nga duna kini warrant of arrest sa kasong murder.

Gidakop kini sa kapulisan tungod sa maong warrant ug gidala sa estasyon.

Giklaro ni Belongilot nga person of interest lang si Arpon ug wa pa maprobar kon siya ba ang ni-ambush.

“Person of interest lang ni siya kay wala pa man gyod mi lig-on nga ebidensya kon siya ba gyod ang nibuhat. Pero on going amo pagkuha og dugang impormasyon nga makatabang sa ato investigation,” matod ni Belongilot.

Gitutokan sa kapulisan ang motibo nga personal nga kasuko ang hinungdan sa insidente.

Matod ni Belongilot nga mao pa lang kini ang ilang naestablisar nga motibo.

Wa usab gikompirmar sa kapulisan nga batos sa usa ka pulitiko si Arpon.

“Dili gyod mi makatubag ana kay ang ingon niya nga house boy ra daw siya,” pasabot ni Belongilot.

Gibalhin na sa Calubian Sub Provincial Jail si Arpon kahuman sa commitment order.

Mahinumdoman nga ang duha ka gwardya ug mga inmate gikan sa Villaba sakay sa traysikol.

Pag abot sa pangpang sa Barangay Tagbubunga, gisundan kini sila sa riding in tandem ug gipamusil ang duha ka ,ha gwardya nga nag angkas likod sa drayber.

Patay diha diha ang duha ka gwardya ingon man ang drayber nga si Apolinario Escoton.

Way naunsa sa mga inmate nga dali nakalukso sa traysikol atol sa insidente.

Sa lima ka inmates, walay bisan usa nga nakamay-ong sa nagbuhat gumikan sa ka paspas sa hitabo ug sa kahadlok. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph