SUPERBALITA CEBU

Radaza, Chan nagpasanginlanay

NAGKAINIT: Ang mga kampo nila ni Lapu-Lapu City Mayor Paz Radaza (wala) ug mayoral candidate Junard "Ahong" Chan (tuo) nag-iyahay og pasangil sa giingong pagpanghasi. Timaan kini sa nagkainit nga kampanya sa eleksyon sa Dakbayan sa Lapu-Lapu. (Allan Cuizon)

MGA kampo nila ni Mayor Paz Radaza ug sa iyang kaatbang Junard “Ahong” Chan nagbayloay og mga pasangil sa pagpang-harass.

Nipasangil si Chan nga adunay plano nga ipa-ambush siya sa iyang kaatbang sa politika sa dakbayan ning nagsingabot na ang Mayo 13 nga piniliay.

Matod ni Chan nga usa ka sakop sa City of Lapu-Lapu Allied Force (CLAF) nipasidaan sa ilang mga supporter sa Sitio Paradise, Brgy. Pajo nga dili na magsige og uban sa ilang campaign rally gumikan kay adunay planong banhigan siya.

Alang ni Chan makapabalaka ang taho kon ugaling tinuod kini sanglit nagpakita lang nga desperado na ang iyang kaatbang sa pulitika.

Gawas niini, giingong gipang harass ang ilang mga supporter sa kampo ni Radaza.

Matod ni Chan aduna silay supporter nga gi-harass sa Brgy. Bangkal gumikan kay nagsul-ob og t-shirt sa ilang grupo.

Gipahubo kini matod pa sa mga opisyal ug tanod sa barangay ug gipailis og t-shirt nga kampo sa mga Radaza.

Aduna usay laing supporter sa grupo nga giingong sakop sa CLAF nga gitangtang sa way igong rason gumikan kay matod pa nisuporta kanila.

Aduna say laing mga supporter sa Brgy. Agus nga giingong gibaharan nga demolison sa ilang pinuy-anan kung ugaling adto mosuporta sa ilang kampo.

Daghan usab silang mga supporter sa laing mga barangay nga gipangdapatan sa mga supporter sa mga Radaza ug gipangtangtang ang ilang mga campaign materials.

Gumikan niini gipangkuhaan na karon og affidavit ang ilang mga supporters nga giingong gipang harass sa kampo sa mga Radaza aron ilang pasakaan og sumbong sa Commission on Elections (Comelec).

“Desperado na gayud ang ilang gipakita kay ngano man nga ila mang harason ang mga tawo nga wa man ni mga sala igo ra ni sila nipadayag nga mosuporta sa among pundok,” matod ni Chan.

Sila kunoy gihasi

Apan si Radaza, sa iyang bahin, nisumbalik sa pasangil ni Chan nga mao usay nang harass sa ilang mga supporter.

Gihagit sa mayor si Chan nga magpaunhanay na lang sila og pasaka ug kaso sanglit nag-andam na usab sila og affidavit sa mga gipang harass ni Chan.

Wa usab mahitabo nga nanangtangtang sila og campaign materials sanglit ang kampo ni Chan ang kanunay manabon sa ilang mga campaign materials.

Kon adunay nanangtang personal na nga desisyon sa tag-iya sa mga balay nga ilang gibutangan sanglit dili kini mga supporter ni Chan.

Wa usab siya makahinumdom nga aduna silay gitangtang nga sakop sa CLAF sanglit di na mahimo nga makatangtang ug makadawat og sakop sa CLAF ang dakbayan nunot ning election period.

Gikataw-an lang usab ni Radaza ang pasangil ni Chan nga plano siyang ipa-ambush sanglit nagpakita lang kini nga si Chan mao ang desperado ug di ang iyang kampo.

“Iya ra nang hunahuna. Sa ato pa diay, iya nang buhaton sa amo? Nganong ambushon man siya kon in-ana nga kuan na rattle na siya, di nami motagad anang in-ana. Nagka rattle-rattle na gud siya. Ako pa niya mangompanya siya og maayo,” matod ni Radaza.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph