KAPULISAN sa Dakbayan sa Mandaue mohangyo sa nabiling pamilya sa magtiayong Michael ug Fraldane Canes nga i-turn-over una kanila ang uban pa nga mga gadget o gamit sa komunikasyon alang sa pagpalawom pa sa imbestigasyon.
Ang Mandaue City Police Office (MCPO) niangkon nga hangtud karon blangko pa sila kon si kinsa ang mga kriminal sa pagpatay sa magtiayon.
Sa panghinaot nga aduna pay makuha nga dugang nga lead sa pagpunterya sa mamumuno sa mga biktima sa pagpamusil patay ug pagpangawat sa magtiayon nga si Michael ug Fraldane Canes.
Mohangyo ang MCPO ngadto sa matag pamilya sa duha o sa mga suod nga higala sa mga biktima, nga i-turn-over una ngadto sa kapulisan ang ubang gadget o gamit diha sa pagpakig-communicate o pag-transact sa mga biktima sa ilang mga kliyente diha sa ilang negusyo nga mga ready to wear (RTW) nga mga overrun.
Kini sama kon aduna ba kini laptop, iPad, o uban pa nga cellphone, aron mapaubos sa forensic examination.
Kay matud ni Police Col. Julian Entoma, director sa MCPO, nga posible nga aduna silay makuha nga impormasyon, sama sa mga katapusang gikakontak sa mga biktima o ka-transakyon diha sa ilang negusyo, human nga giingon nga gikan naghatud og mga paninda sa North Bus Terminal ang magtiayon una sila gipatay.
Dugang na ang gidaghanon sa mga kwarta nga dala sa mga biktima, niadtong Abril 14 sa gabii, diin uban pa sa duha ang ilang anak.
Lakip sa tinguha sa mga pulis nga ipa-describe sa mga nakakita nga silingan o kabanay sa magtiayon, niadtong giingon nga kadudahang mga lalaki nga giingong nakita sa palibot sa panimay sa mga biktima sa Barangay Umapad pipila ka adlaw saw ala pa ang insedente.
Gani buot sa direktor nga mapahimuan og cartographic sketch, o pagpakita kanila sa ilang rogue gallery sa mga kreminal sa sydudad.
“Ato hangyuon ang tagtungod kon naa pay personal gadget ang couple nga ato ipaubos sa forensic sa crime lab, kay kon robbery gyud, masusi nato kon gi-set up bah, kay ubay-ubay to nga kwarta ang dala, mga two weeks ra. Kon wala, aw ibalik ra man sad dayon nato,” saysay ni Entoma sa Superbalita Cebu.
Gawas sa negusyo sa mga biktima nga RTW, matud ni Entoma nga padayon usab ang ilang gisubay nga nakuha nga impormasyon kalabot sa giingong kalambigitan sa duha sa ilegal nga drugas, apan kini hugot nga gihimakak sa ilang pamilya. (FMD)