UNSAY hinungdan sa pagka-oktaba sa bidding proper sa tulo ka ektaryang luna sa South Road Properties (SRP) nga ibaligya sa Cebu City Government og labing menos nga P3.3 bilyones?
Tungod kini sa kadako sa kantidad sa 10% nga cash bond ug 50% nga downpayment sa kantidad sa yuta.
Ang mga developer o kompaniya nga nisalmot ninghangyo nga iuswag una ang bidding proper sa 3 ka ektaryang luna sa (SRP).
Si Veronica Morelos, chairman sa committee on awards, nagkanayon nga kinahanglang magdala og P300 milyones nga cash ang matag bidder isip 10% nga cash bond para makasalmot sa bidding.
Ang developer nga adunay labing dako og bid lapas sa P110,000 metro kwadrado maoy ideklara nga mananaog apan kinahanglan silang mohatag og katunga sa kinatibuk-ang presyo sa yuta isip bayad na sa Cebu City Government sa notice of award.
Ang duha ka provision maoy gitumbok ni Morelos nga hinungdan sa paghangyo sa developers nga iuswag ang bidding.
Si Morelos niingon mga maghuwat sila sa hukom ni Mayor Tomas Osmeña ug mopadala ra sila og komunikasyon sa mga interested buyer.
Labella mihangyo
Si Bise Mayor Edgardo Labella nanawagan ngadto sa mga land developer nga paliton na ang tulo ka ektaryang luna sa SRP.
Ang bise mayor niingon nga duha na katuig ang nilabay human ang konseho nga iyang gipangulohan nihatag og authority ni Mayor Tomas Osmeña.
“We authorized him two years ago to sell the property at P110,000 per square meter so kon kinsa man tong ganahan mopalit palihog palit namo og bid documents ug apil sa bidding proper para mahalin na ang maong yuta because it adds the development to our city,” padayag sa bise mayor.
Si Labella kinsa modagan pagka-mayor sa siyudad batok ni Osmeña niingon nga gibuhat na sa konseho ang ilang papel mabaligya ang maong lote ug anaa na sa mga kamot sa executive unsaon niya pagtuman ang iyang gipasigarbo.
“Kana ila nanang problema (ang pagbaligya) tinuod man kaha nga adunay interested buyers? That’s a welcome development for our beloved city,” dugang sa standard bearer sa Barug PDP-Laban.
Sila si Konsehal Raymond Alvin Garcia ug Joel Garganera, sakop sa minority sa konseho, nagtuo nga ang pag-oktaba sa bidding proper sa ikatulo nga higayon resulta sa kapakyas pagtunga sa bidders.
“Asa naman ang inyong buyer intawon kay naghinamhinam na kami uban sa mga Sugbuanon nga mahalin ang maong yuta kay it could generate funds and employment to our City and more services that we could offer to our residents,” padayag ni Garganera.
“Sige lang ning pagarpar ug paghambog atong kasamtangang mayor kay mahalin kuno og P110,000 per square meter ang yuta, apan asa naman? Katulo naman ni gi-postpone. Mahimo diay na nga naa man kahay mga bidders?," padayag ni Garganera.
Si Osmeña nangangkon nga gi-underpriced ni kanhi mayor Michael Rama ang pagbaligya sa 46 ektaryas nga luna sa SRP nga nahalin og tag P38,000/square meter hinungdan nga iyang ibaligya og P110K matag metro kwadrado.
Apan si Labella niingon nga gidoble pa nila ang gilatid sa COA sanglit P19,000 ra ang ilang floor price.
Dugang ni Labella nga gidasonan kini sa korte uban sa desisyon mga fair ug legal ang pagbaligya sa maong propiedad sa dakbayan sa SRP.