NASUTA nga duha ka managlahing mga Certificate of Candidacy (COC) ni Lapu-Lapu City mayoralty candidate Junard “Ahong” Chan ang nadawat sa ulohang buhatan sa Commission on Elections (Comelec).
Base sa memorandum no. 190378 nga giluwatan ni Atty. Consuelo Diola, acting Comelec Secretary, pinitsahan niadtong Abril 4, 2019, adunay daan nga porma sa COC nga gi-fill up ni Chan ug ang amended COC nga pulos gi-notaryohan ug giduso niadtong Oktubre 16, 2018.
Ang gihulipan nga election officer sa Lapu-Lapu Atty. Ann Janette Lamban niduso gilayon og resolution o certification nga nagpahibawo sa Comelec Manila nga duha ka managlahing COC ang gi-file ni Chan.
“These circumtances give credence to the certification of Lamban that the COC using the amended form was filed 16 October 2018,” tipik sa natala sa memo ni Diola.
Gibinuangan?
Samtang nagduda si Chan, nga adunay nagmani-obra sa iyang COC sa dihang managlahi ang dokomento nga naabot sa ulohang buhatan sa Comelec ug ang giduso sa Comelec Lapu-Lapu.
Bisan pa man, namahayag ang election officer sa Lapu-Lapu Atty. Rainer Layson nga base sa talaan sa official ballots, naa ang ngalan ni Chan isip kandidato.
“Para nako morag dunay sabotahe,” tipik sa pamahayag ni Chan kinsa mipatawag og press conference, Miyerkules, Abril 24.
Sumala pa niya nga human mipagawas ang iyang kaatbang nga giingong disqualified ang iyang kandidatura base sa en banc resolution no. 18-1182 o ang wa paggamit sa bag-ong porma sa COC diin adunay “Item No. 22” sa pangutana kon aduna bay kaso nga gi-atubang ang kandidato.
Personal nga gisusi ni Chan sa law department sa Comelec Manila ang maong isyu.
Nasuta nga ang dokomento nga gi-forward way “Item No. 22” apan sa iyang giduso sa Comelec Lapu-Lapu, ang husto nga kopya sa COC ang nadawat.
Gipahibawo ni Chan nga giingong gihusay na sa law dept. ang kasungian ug gikatakda nga mopagawas ang en banc og lahi nga resolution may labot niini aron maklaro ang isyu. (FVQ)