MAS nisamot og nilig-on ang mga pagduda nga dili gyud ang self-confessed druglord nga si Franz Sabalones ang napatay sa Quezon City niadtong miaging semana. Hangtod karon wala pa ma-klaro ang identity sa biktima. Gawas sa usa ka Joselito Cabilao kinsa nagpa-ilang kabanay ni Sabalones didto sa kaulohan nga maoy mi-ila sa lawas nga iya kang Franz, walay lain tawo nga mi-ila. Ang kapulisan sa Quezon City, wala makaila ni Sabalones.
Nganong naka-ingon ko nga milig-on ang pagduda nga dili si Sabalones ang napatay? Una, wala mo-kompirmar ang mga opisyal sa kapulisan dinhi sa ato. Ikaduha, ang mga kabanay mismo ni Sabalones wala may emik. Way miadto nila sa kaulohan aron pag-claim sa lawas kon iya man kini kang Sabalones. Wala man sila nagpakabana bisan sa panawagan sa kapulisan nga mopatim-aw aron makuhaan og DNA samples aron i-match sa DNA sa lawas.
Dili ba usa sa atong kustombre nga bisan unsa ka boang anang atong paryente, panahon nga mamatay, ato man hatagan og desenteng lubong? Mohipos man gani ta sa patay natong binuhi sama sa iro, kana pa kahang tawo? Asa diay ang mga ginikanan ug mga igsoon ni Franz? Nganong wala man sila magpakabana? Kana kon kombinsido sila nga si Franz kanang gipatay. Wala sila maghikutar gumikan kay sila mismo dili kombensido nga si Franz ang gipatay. Sila mismo nagduda?
Sa dihang buhi pa si Franz ug nagnegosyo pa sa illegal nga drugas, sigurado nga nakaprobitso o nakapahimulos usab ang iyang mga kabanay sa kinitaan. Naka-pundar og mga properties si Franz sama sa beach resort ug farm. Bigtime druglord god siya. Nganong karon nga patay na siya, walay usa sa iyang kabanay ang maghikutar sa paghipus sa iyang lawas?
Ako nagduda nga dili to si Franz ang gipatay. Ang pagpagawas nga gipatay siya, binuhatan siguro sa sindikato aron dili na gukdon sa awtoridad. O ba kaha premyo sa gobiyerno gumikan sa iyang pagpakita og kooperasyon sa kagamhanan sa kampaniya batok sa illegal nga drugas human siya motahan. Mao nga angay sutaon sa awtoridad sa dili pa ilubong ang ‘Franz Sabalones’ nga gipatay aron mawala ang tanang pagduda.(bobbygnalzaro@gmail.com)