WA MADAYON ang akong plano nga molayat sa Bantayan sa niaging Semana Santa. Kini tungod sa gikatahong kanihit sa tubig didto (sama sa ubang dapit sa lalawigan ug sa nasud).
Di ko gustong makadugang sa problema didto. Hehe. Nakahukom kong sa Oslob ra ko magpalabay sa Semana Santa.
Menos og gasto ug nakapalawom pa ko sa akong pagtoo.
***
Gusto mong makakita sa linawas ni Hashtag Maru Delgado? Siya ang molingaw sa mga mosaksi sa katapusang bola sa A Million Thanks raffle promo Gaisano Main, Country Mall ug mga igsoon tindahan sa Bogo, Balamban ug Moalboal.
Adto sa parking area sa Country Mall ugma sa gabii. Tambong aron malingaw ug modaug (kinsay nasayod?).
***
Sa dihang akong nakita dinhi sa Laysho ang hulagway sa anak ni Ruffa Gutierrez nga si Lorin Gutierrez Bektas nga nagsul-ob og two-piece swimsuit, nakaingon ko nga mosunod gyud ni sa tunob sa inahan nga nag-artista dayon nahimong beauty queen.
Gwapa si Lorin, nindot og lawas ug, sa komedya pa, tag-as ang iyang long-legged legs. O-ha!
***
Nianhi gyud sa Cebu niadtong Miyerkules ang awtoridad sa kaanyag ug gitawag nga tigpagwapo ug tigpagwapa sa mga artista.
Kini atol sa grand launch sa Bluesky Gel Polish ug Magic Keratin diin siya ang natudlo nga ambassador.
Didto usab ang tag-iya sa kompaniya (Binondo Beauty Supply) nga si Rodney Palaginog ug ang tig-apod-apod dinhi sa Cebu nga si Banbi Ng sa HMB Trading.
May gipahigayon nga presscon, dinner ug pasundayag didto sa Bai Hotel. Alegre ug malamposon ang kalihukan.
***
Nalingaw ko niadtong gisaulog ni Regine Velasquez ang iyang adlawng natawhan sa Asap Natin ‘To di pa dugay.
Tiaw mo bang napundok ang mga diva nga sila si Zsa Zsa Padilla (Divine Diva), Kuh Ledesma (Pop Diva), Jaya (Queen of Soul), Pops Fernandez (Concert Queen), Dulce (Timeless Diva), Sarah Geronimo (Pop Royalty) ug ang New Generation Divas (Morisette, Yeng Constantino, KZ Tandingan ug Clarisse de Guzman).
Didto usab sila si Martin Nievera, Jed Madela, Ogie Alcasid ug Eric Santos. Syempre, tigi ang nahitabo. Talagsaon. Lingaw kaayo.