KON makaduaw kamo sa lungsod sa San Francisco, isla sa Camotes, Sugbo gawas sa pagpangaligo og dagat, adunay lugar nga haom pamalandongan sa mga kasakit ni Hesus.
Kini ang Kalbaryo nga nahimutang sa bungtod sa Barangay Sunog nga dagsaan sa mga Romano Katoliko ilabi na sa bag-uhay lang natapos nga Huwebes Santo ug Biyernes Santo.
Dalan sa kasakit
Sa dapit, makita ang 14 ka mga Estasyon sa Krus o ang dalan sa Krus nga nailhan usab nga Paagi sa Kasubo.
Ang mga estasyon mao ang: (1) Si Hesus gihukman nga mamatay, (2) Si Hesus gipapas-an sa krus, (3) Si Hesus nasukamod sa unang higayon, (4) Nakasugat ni Hesus ang Iyang inahan nga si Maria (5) Si Simon Cireneo nitabang pagpas-an sa krus, (6) Gipahiran ni Veronica ang nawong ni Hesus, (7) Si Hesus nasukamod sa ikaduhang higayon, (8) Nakasugat ni Hesus ang mga babaye sa Herusalem, (9) Si Hesus nasukamod sa ikatulong higayon, (10) Si Hesus gihubuan sa Iyahang sapot, (11) Si Hesus gilansang sa krus, (12) Namatay Si Hesus sa krus, (13) Gikuha ang lawas ni Hesus gikan sa krus, ug (14) Gilubong si Hesus sulod sa lubnganan.
Life-sized nga mga imahe
Ang mga estatuwa naghulagway sa pag-antos ug kasakit ni Hesukristo sa adlaw nga siya gihukman nga patyon hangtod nga siya gilansang sa krus sa Calvary ug namatay.
Kini nga mga kasakit makita pinaagi sa life-sized nga mga imahe o estatuwa nga gipahimutang sa luna nga gipanag-iya sa pamilyang Durano.
Sigon ni Leslie Christe Gok-ong, tourism officer sa San Francisco, tuyo sa Kalbaryo nga maghimo og sakripisyo ang mga tawo pinaagi sa pagpamalandong sa pasyon ni Hesus.
Higayon usab kini sa mga turista nga mamalandong samtang namakasyon sa mga beach resort sa ilang lungsod.
Sumala ni Gok-ong naandan na nga tulumanon sa mga pamilya nga mga Romano Katoliko nga maghimo sa ilang Via Crusis nga ang uban manukad sa simbahan sa lungsod ug magbaktas og gibanabana nga 16 ka kilometros paingon sa kinatumyang bahin sa Kalbaryo.
Gimugna ni Mano Amon
Ang Kalbaryo, matod niya, natukod niadto pang dekada 70 panahon ni anhing Ramon Durano Sr., nga mas naila nga Mano Amon.
Sa kinaibabwan sa Kalbaryo, makita ang kapilya diin magdagkot og kandila ug mag-ampo ang mga tawo.
Makita usab sa ibabaw, ang atbang nga isla sa Tulang Diot, ang Lake Danao ug ang ubang bahin sa Camotes.
Presko ang hangin sa imong pagtungas kay daghan og mga punoan sa kahoy sa dapit.
Gikan sa Kalbaryo, mga 300 metros ang gilay-on, mabisita usab ang nabantog nga Timubo Cave nga may bugnaw nga tubig sa ilawom.
Way bayranan kon motungas ka sa Kalbaryo.
Si Gok-ong nidugang nga niadtong panahon sa kanhi administrasyon ni Bise Mayor Al Arquillano niadtong 2009 - 2010 katapusang napa-rehabilitate ang ubang mga estatuwa nga nangadaot o nangabuak na diin ang lokal nga kagamhanan sa lungsod ang nitabang.
Kon gusto ka moadto sa Kalbaryo, mahimong mosakay og habalhabal ug mag-agad sa inyong sabot sa drayber ang pleti o mahimo usab ka moabang og multicab.