Super Board: Ford Philippines milusad sa Ford Cebu Media Drive

NAGKATAAS ang demanda sa auto industry sa tibuok kalibotan alang sa pickup trucks nga pangkargamento nga mahimong pang-lifestyle sa samang higayon ug, ang Ford Ranger wala magpauwahi sa uso ug kabag-ohan sa panahon apan nagpabilin ang iyang kakusog, kalig-on ug kataas sa resistensiya.

Ang bag-ong Ford Ranger nagtanyag sa new generation powertrain uban sa 10-speed automatic transmission ug mas advance features alang sa komportable ug luwas nga biyahe bisan sa mga bukirang dapit. Nagpasabot kini nga mahimong pangpamilya, sa taas nga biyahe, negusyo o pang-abag sa pag-umahan.

Ang Ford Philippines nipasiugda og Ford Media Drive niadtong Marso 29 ug 30 latas sa kabukiran sa dakbayan sa Sugbo ug lungsod sa Balamban agi sa laing apiki ug delikadong dan aron pagmatuod sa gahom sa Ford Ranger subay sa gipasigarbo nga bag-ong teknolohiya sa sakyanan.

Dul-an sa napulo ka mga lokal media, lakip ning tagsuwat, niapil sa talagsaong kanasinati ug kaanindot uban sa kulba-hinam nga biyahe sa rural nga bahin sa malambuong Metro Cebu.

Makaingon kita nga ang Sugbo dili lang world-class beach resorts ug heritage sites nga pagdani sa mga turista, apan nagbaton sa bahandi sa mabugnaw nga kabukiran nga wala pa matutuki sa kampanya alang sa turismo.

Si EJ Francisco, AVP for Communications sa Ford Philippines, niingon nga unang higayon kini nga ilang gihimo sa Sugbo busa excited sila sa resulta sa Ford Media Drive.

“We will replicate this event to other areas in the country, like in Bacolod,” matod ni Francisco.

Dili mominos dul-an sa 60 kilometros ang gilatas nga dalan gikan sa Ford Showroom sa Nivel Hills, Lahug dakbayan sa Sugbo padulong sa Manuel Labrador Cutflower Farm sa Barangay Babag, lettuce farm sa barangay Sudlon II, Cremdec sa Barangay Taptap, Tom’s Garden sa Taptap, Nerie’s Ville sa Barangay Lusaran, fun drive sa apiking dan sa Barangay Tagbao ug Tabonan, ug Strawberry Farm sa Cantipla.

Ang grupo nihimo og hamubong programa sa Sudlon II sa donasyon nga walo ka mga dagkong plastic water drums ngadto sa Satuhan Farmers Association, award-winning farmers ogranization sa dakbayan sa Sugbo.

Ang grupo nipalabay sa kagabhion sa West 35 Eco Resort sa Balamban.

Ang gigamit sa biyahe sa grupo nga gibahin og duha mao ang XLS ug XLS variants sa Ford Ranger.

Ang bag-ong Ranger nagtanyag sa tulo kapian sa diesel powertrains nga naghatag sa dakong versatility ug motubag sa halapad nga demanda nga gikinahanglan sa kustomer.

Naglakip kini sa new generation 2.0L Bi-Turbo ug 2.0L Turbo engines ug ang napamatud-an na nga 2.2L TDCi engine. Apan bugtong available sa Wildtrak 4x4 variant, ang new-generation 2.0L Bi-Turbo diesel nga gipares sa advanced 10-s[eed automatic transmission.

Human sa naasoy nga Media Drive, nasinati mismo ning tagsuwat ang mas maayong torque sa sakyanan, flexible sa pagmaneho, mas hilom nga andar sa iyang makina ug komportable kaayo sa kinatibuk-an. (RRM)