HINGPIT nga gipuo sa Balamban Ship Builders ang paglaom sa Danao City squad pinaagi sa makutas nga kadaugan nga niagi pa og overtime, 90-88, sa quarterfinals round sa 3rd Cebu Governor’s Cup nga gipahigayon didto sa Argao Municipa Gym.
Sa kadaugan, napahugtan sa Ship Builders ang ilang paghupot sa ikaduhang dapit sa Bracket A nga may 4-1 nga baraha, sunod sa Mandaue City Ballers, 4-0. Ang Danao nahagsa sa 1-3 nga baraha.
Naghupot sa ikatulong luna ang Medellin Sweeteners nga may 3-1 nga baraha. Karong Dominggo magtinaktakay ang Balamban ug Medellin alang sa ikaduhang puwesto sa dihang motapon ang quarterfinals round diha sa Mandaue City Sports Complex. (JBM)