MIDAHUNOG karon ang hungihong nga si Keith Thurman gyud ang makontra ni Manny Pacquiao ug ang petsa gikatakda karong Hulyo 20 didto sa Las Vegas.
Matod pa nga ang kasabotan hapit na mahingpit ug ipahibawo kini mga duha ka semana gikan karon.
Ang MGM Grand maoy posibling dapit nga kapahigayonan sa maong away.
Kon way kakulian kini maoy panagtigi unya sa duha ka welterweight champions. Si Pacquiao mao karon ang naghupot sa World Boxing Association (WBA) regular title samtang si Thurman mao usab ang WBA Super champion sa maong timbang.
Si Mike Coppinger sa Insider PBC Boxing, mibutyag nga haduol ug hapit na gyud mahitsas ang ilang papeles alang sa maong away ug sa pagkakaron, wa silay nakitang babag.
Ang 40-anyos nga Pacquiao, pabilin gihapon nga atraksiyon sa kalibutan sa boxing bisan pa sa iyang pangidaron.
Ang yano niyang kadaugan batok sa mas bata pa niya nga si Adrien Broner sa niaging Enero 19 sa MGM Grand maoy nakapahumot og balik sa iyang karera. Kini miohalin og 400,000 sa pay-per-view.
Ang eight-division world champion nga Pacquiao naghupot og 61-7-2, 39 knockouts, samtang si Thurman wa pa makaangkon og kapildihan sulod sa 29 ka away. (JBM)