DUL-AN sa P100,000 ang danyos sa sunog sa Upper Hermag village sa Barangay Pagsabungan, Dakbayan sa Mandaue, Miyerkules sa hapon, Abril 24.
Daling nialarma ang kabomberuhan sa Mandaue City Fire Station human niulbo ang kayo sa Upper Hermag Village, diin 11 ka mga balay ang naugdaw.
Moabot sa 80 ka mga tawo ang apektado, hinuon way natala nga nakalas o naangol.
Ang kayo, base sa pakisusi sa kabumberuhan, nagsugod sa ikaduha nga andana sa panimay nga iya kang Mercedes Aliguay.
Giisa kini sa 3rd alarm ug gideklarar nga kontrolado alas 6:45 sa gabii ug hingpit nga napawong alas 7:34 sa susama nga adlaw.
Hangtod Huwebes sa hapon, Abrl 25, padayon pa ang gihimo nga pakisusi kon unsay hinungdan sa sunog.
Dali usab nga niapud-apud ang City Social Welfare Services sa mga relief goods nga alang sa tulo ka adlaw.
Matod ni Jessie Perez, pangulo sa City Social Welfare Services, nga adunay 24 ka mga apektado nga pamilya, diin napulo niini tag-iya sa panimay ug ang uban sharer o nag-abang lang.
Ang kagamhanan mohatag og P10,000 nga financial assistance sa nasunugan nga tag-iya sa balay ug P5,000 sa nag-abang ug sharer. (FMD)