KAPIN sa 5,000 ka bakanteng mga trabaho ang mahimong ma-apply sa mga nangita og trabaho atol sa local jobs fair nga pasiugdahan sa Public Employment Service Office (Peso) sa kagamhanan sa lalawigan sa Sugbo atol sa adlaw sa mga mamumuo sa Mayo 1.
Ang screening ug interview magsugod sa alas 7 sa buntag sa social hall sa Kapitolyo, siyudad sa Sugbo.
Si Julius Chua, labor and employment officer III sa Peso sa Kapitolyo, nibutyag nga 41 ka mga kompaniya ang nikompirmar nga moapil sa jobs fair karong tuiga nga nagtanyag og lainlaing klase sa mga trabaho.
Kini sama sa sales staff, cashiers, clerks, customer service representatives, office staff, service crew or attendants ug uban pa.
Matod niya ang mga kompaniya sa wholesale and retail trade, pag-ayo og mga sakyanan, ug pagbaligya og household goods ang dunay labing dako panginahanglan og mga trabahante (1,092).
Nagsunod ang manufacturing 1,071 ka mga mamumuo ang gikinahanglan; konstruksyon (965); information and communication (964); human health and social work activities (364); accommodation ug food service (279); transportation and storage (178); ug financial and insurance activities (108).
Ang mga aplikante kinahanglan magdala og resume o biodata nga dunay 2X2 nga hulagway, diploma sa high school o kolehiyo ug certificates sa panarbaho kon duna nay kasinatian ug blangko nga application letter.
“Og ilang aplayan 10 ka buok, 10 sad ka set, way limit sa pag-apply,” pahibawo ni Chua dihang nahinabi sa Superbalita Cebu niadtong Huwebes, Abril 25.
Siya niawhag sa bag-ong mga ni-graduate sa Grade 12 nga di pa ganahan moeskwela ug gusto na motrabaho sa pag-apply sa local jobs fair.
Si Chua nitambag sa mga aplikante nga kumpletuhon ang mga rekisitos nga gikinahanglan ug andamon ang kaugalingon aron ma-hire on the spot.
Sa miaging local jobs fair niadtong Nobiyembre 18, 2018, 39 ka mga aplikante ang na-Hots.
Sukad gisugdan ang registration sa jobs fair niadtong Enero 28, kapin sa 100 pa lang ang nagparehistro sa ilang buhatan.
Si Chua nidugang ang jobs fair dunay one-stop shop alang sa mga ahensiya sa kagamahanan sama sa National Bureau of Investigation, Social Security System, Philippine Statistics Authority, Philippine Health Insurance Corporation (Philhealth), Land Transportation Office, Cebu Provincial Prosecutors Office nga moisyu og libre nga affidavit of loss.
Karong Hunyo 23, buwag himuon ang overseas jobs fair.