Gisugdan na og apud-apod sa Commission on Elections (Comelec) niadtong Huwebes sa kaadlawon, Abril 25 ang mga ballot box nga gamiton sa Mayo 13 nga mid-term election sa kalungsuran ug mga dakbayan sa lalawigan Sugbo.
Si acting Cebu Provincial Election Supervisor Jerome Brillantes mipahibawo nga ang mga trak sa LBC Express, ang nihatod sa mga ballot box sa lainlaing mga local government unit gikan sa ilang bodega sa dakbayan sa Mandaue.
Karong Mayo 6 o 7, sunod ihatod sa mga lungsod ug siyudad ang mga vote counting machine (VCM) nga maoy gamiton sa pag-ihap sa mga balota nga nakuha sa mga kandidato, ngadto sa mga buhatan sa election officers.
Niadtong Abril 20, unang naabot sa Sugbo ang 3,400 ka mga VCM ug dugang 800 ang naabot niadtong Abril 23, sakay sa 12 ka container vans og 400 niini ang alang sa contingency kon dunay mapalyar nga makina sa lungsod o siyudad.
Ang mga VCM naa gipahimutang sa bodega sa LBC Express sa Mandaue nga higpit gibantayan sa kapulisan ug Comelec.
Ang Comelec nitakda sa Mayo 10 alang sa synchronize testing ug sealing sa mga VCM.
Ang lokal nga mga kandidato o mga watcher sa mga partido gidapit nga mosaksi niini.
“It is up to the election officers if they will centralize ang sa testing and sealing. Mag-centralize ba sila o didto ba gyud sa presinto. All our machines will be tested and sealed on that day,” dason ni Brillantes dihang nahinabi sa Superbalita Cebu.
Tumong niini nga masusi ang mga makina kon nag-function ba ug kon ang VCM nga gihatod kay naa sa tukma nga presinto o siyudad o munisipyo.
Sigon ni Brillantes ang opisyal nga mga balota na lang ang ilang gipaabot sanglit naabot na usab ang ubang gamitunon sa piniliay sama sa ballpen, indelible ink, ug uban pa. (SCG)