MANDAUE City Vice Mayor Carlo Fortuna nihulagway sa mga konsehal sa opposition nga anti-poor ug anti-people.
Human nga ang Mandaue City Council ni-aprubar og resolution pag-awhag sa Commission on Elections sa pagpabasura sa bisan unsa nga petition sa pagpa-exempt gikan sa mga provision sa Election Code.
Kini mahitungod sa pagpagawas og financial assistance sa kagamhanan nga atol sa local campaign period sa dihang mipasangil ang oposisyon nga gigamit ang programa alang sa pamulitika.
“The administration is holding the life of every Mandauehanon hostage by dangling out money, like a lure to hungry fish at the start of the election campaign. Conditioning it on their fate come May 2013,” tipik sa privilege speech ni ABC President Ernie Manatad.
Giingong gipapaspasan ang pagpagawas sa financial assistance ug ipatuo nga gikan sa private individual.
Atol sa regular session sa Mandaue City Council, Abril 24, niduso og resolution ang pito ka mga konsehal sa opposition aron sa pag-awhag sa Comelec nga ibasura ang bisan unsa nga hangyo sa Mandaue City nga i-exempt ang pagpadayon sa paghatag sa financial assistance ngadto sa mga beneficiaries nga anaa sa krisis nga sitwasyon, ilabi na sa mga petsa gikan sa Marso 29 hangtud sa Mayo 12 nga maoy campaign period.
Ang pito ka mga konsehal kaalyado ni Kongresista Jonas Cortes, nga pagpapili pagka-mayor sa Mandaue atbang ni incumbent mayor Luigi Quisumbing.
Sa resolution, gihimug-atan niini nga ilang gidudahan nga baliwalaon ang provision sa Omnibus Election Code, sa Section 261, Article 22, sa pagdili sa pagpagawas sa public funds ubos sa social welfare ug ubang susama nga ahensya, gawas lang sa mga sweldo, naandan ug normal nga galastuhan o mga programa.
Matod ni Manatad nga ilang nakita nga nagamit sa pamolitika ang public funds, diha sa pagpangampanya sa kampo nila ni Quisumbing, Bise Mayor Carlo Fortuna ug mga kauban nga magpapili pagka-konsehal.
Apan gisumbalik ni Fortuna nga ang pikas kampo maoy namulitika.
Matod niya nga bisan pa wala ang exemption gikan sa Comelec, ang programa nga Hinabang sa Edukasyon, Livelihood ug Panlawas sa Tanan (HELPS) diin nag-agi ang pagpanghatag sa financial assistance, alang sa pagpahospital, edukasyon, burial, ug medical maintenance, dialysis ug uban pa ang daan na nga programa sukad niadtong hinapos nga bahin sa 2017.
Dugang ni Fortuna nga nagsubay sila sa nalatid nga balaod sa Comelec, hinungdan nga magpadayon gihapon ang pagpanghatag sa mga financial assistance, pinaagi sa HELPS.
“Ilang intent is to tell Comelec nga do not allow the City to keep on releasing the financial assistance. Ilang gipugngan o ipaundang ang paghatag og hinabang sa mga tawo. Of course we are outvoted, so the resolution was passed. So gusto nila ato ingnon ang mga tawo, nga ayaw mo kasakit karon kay dili mi kahatag og tabang,” saway ni Fortuna.
Gitug-an ni Fortuna nga sukad sa pagsugod, aduna na silay kapin sa 15,000 ka beneficiaries ang natabangan. Samtang gikwestyon sa kampo ni Cortes nga abnormal nga pagdaghan sa mga napagawas nga pinansyal nga hinabang.