GIINGONG hapit na maselyuhan ang kontrata sa bugno ni Manny Pacquiao ug Keith Thurman.
Dugang pa nga mahitabo ang binigwasay sa duha karong Hulyo 20 sa Las Vegas.
Ang kasabutan suma sa Inside PBC Boxing, ang hapit na maselyuhan ug giingong i-anunsiyo kini sa mosunod nga semana.
Ang MGM Grand, maoy gilantaw nga venue sa duha ka PBC fighters.
Dugang pa nga kung mahitabo man kini, kini mahimong binigwasay sa duha ka welterweight champions.
Si Pacquiao nga WBA regular champion samtang si Thurman WBA super champion.
“The two camps are “closing in on a deal,” sigun ni Mike Coppinger sa Inside PBC Boxing.
Dugang niya, “and that “there doesn’t appear to be any big hurdles to clear in completing (the) deal.”
Si Pacquiao luyo sa edad nga 40, pabilin nga kinaham.
Ang malampuson niyang pagdepensa sa titulo kontra Adrien Broner niadtong Enero 19 sa MGM Grand mibaligya og 400,000 pay-per-view hits.
Suma pa mas sayon nga ibaligya ang Pacquiao vs Thurman.
Si Pacquiao (61-7-2 uban ang 39 knockouts) taud-taud sab nga naghunahuna sa kung kinsa ang sunod niyang makaharong.
Unang nanggawas ang ngalan nila Errol Spence ug Danny Garcia.
Apan gisulti ni international matchmaker Sean Gibbons pila ka semana ang nakalabay nga si Thurman ang napili nga 30-anyos ug gikan sa Clearwater sa Florida, ug Garcia.
Wa pa hinuoy pinal nga pahayag si Pacquiao sa kung kinsa gyud ang iyang pilion.