GIBUTYAG sa Land Transportation Franchising and Regulatory Board (LTFRB)-Davao nga 8,216 operators sa public utility jeepneys (PUJs) ug filcab, labing nailhan nga multicab, sa rehiyon maapektuhan sa Public Utility Vehicle Modernization Program (PUVMP).
Sa maong ihap, 7,261 PUJ/Filcab operators gikan sa dakbayan sa Davao.
Sa pagtubag sa suliran, si LTFRB-Davao director Cattleya Acaylar nagdasig sa mga maapektuhan nga drayber, operators ug mga miyembro sa pamilya nga moaplay alang sa Tsuper Iskolar Program.
Ang scholarship program, sa pakig-alayon uban sa Department of Transportation (DOTr) ug Technical Education and Skills Development Authority (Tesda), magbansay og kuwalipikado nga mga benepisyaryo sa PUVMP. Ang pagbansay maglangkob sa “skills” ug “entrepreneurship”.
Gidasig sab ni Acaylar ang mga operators nga moaplay kay 1,000 slots lang kon diin “first-come, first-served” ang basihan.
“We are already starting with the application process. Although not everyone is informed about it,” pagklaro niya.
Ang dakbayan sa Davao maoy sunod nga “stop” sa programa, kon diin una kining gilusad niadtong Abril 4 sa Lingayen, Pangasinan.
Mga aplikante sa scholarship magkuha og pre-registration form gikan sa LTFRB-Davao.
Ang mapil-apan nga porma isumite alang sa ebalwasyon ngadto sa Tesda sa One-Stop Service Center for OFWs Online Services nga nahimutang sa 5th floor sa Gaisano Mall of Davao. (RGL)