SECTIONS
Tuesday, May 21, 2019
SUPERBALITA DAVAO

NPA lider wala pikhi sa kinatawo

HUGOT nga gihimakak sa Police Regional Office (PRO)-Davao ang alegasyon sa grupo nga Gabriela Women’s Party nga niluog ang pagpatay kang Cindy Tirado Libot, alyas Jill, giingong deputy secretary sa Guerilla Front 2 sa Southern Mindanao Regional Committee (SMRC) sa New People’s Army, niadtong Abril 15, sa Purok 3-A, Barangay Canocotan, Tagum City, Davao del Norte.

Sumala ni PRO-Davao director Marcelo Morales nga ang tanang alegasyon di tinuod ug malisyuso gumikan kay kanunay nilang giuna ang pagtamod ug pagprotekta sa tawhanong katungod sa matag usa, ilabi na gyud sa katungod sa kababayen-an.

Giklaro ni Morales nga usa kadto ka lehitimong hiniusang operasyon uban sa 71st IB, Philippine Army, aron nga isilbi ang warrant of arrest batok kang Jay Mendoza, executive commander sa Guerilla Front, Sub-Regional Committee 2, SMRC ug iyang mga kaubanan, lakip na kang Tirado, tungod sa kasong murder nga nakadoket sa criminal case numbers; CC# 21736, CC# 8703-2013, CC# 10038-2016, CC# 05-2006 CC#10190-2016.

Apan, sumala sa opisyal, way suwerte kay inay motugyan sa ilang kaugalingon ngadto sa mga awtoridad, nakigpinusilay sila sa operating team.

Apan sila si Mendoza ug uban pang kauban naka-eskapo, biniyaan ang patay nga lawas ni Tirado.

Dugang gitin-aw ni Morales nga ang narekober nga mga gamit sa nahitaboan makasulti nga lehitimo ang operasyon.

Nasayran nga nasakmit gikan sa mga miyembro sa Communist Terrorist Groups sa lugar ang usa ka improvised landmine; usa ka M16 rifle Elisco nga dunay serial number 075858 ug ang chamber gikargahan ug gisudlan og usa ka magazine nga nagbaton og 19 ka buhing mga bala, usa ka improvised tooter, duha ka way sulod nga sachets nga nagbaton og lama sa giingong shabu; 10 ka fired cartridge cases sa M16; ug usa ka camouflage nga short pants sa babaye.

Gisulti sa opisyal nga tataw kaayo nga ang ilang tropa di mogamit og puwersa kon way hulga sa ilang kinabuhi. Usa matud pa kadto ka lehitimong “encounter” ug di nila kontrol kon asa moigo ang mga bala.

Sumala sa medico-legal, si Tirado naigo sa iyang tiyan nga bahin ug sa bukog sa paa, sukwahi sa alegasyon sa pamilya nga kinatawo niini napusgay sa bala.

Gitin-aw sa opisyal nga ang tropa nasayud bahin sa pagpanalipod sa tawhanong katungod. Ug wala nila gi-tolerate ang pag-abuso sa tawhanong katungod.

Hinuon, gipasalig ni Morales nga molusad sila og kaugalingong imbestigasyon sa pakig-koordinar uban sa lain pang law enforcement nga ahensiya aron nga kahatagan og katin-awan ang insidente.

Gipasalig sa opisyal nga ang kapulisan, sa pakig-alayon sa kasundalohan, magpabiling magpungasi sa pagmentinar sa kalinaw ug kahusay sa nasud.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!