Mga dul-an duha ka tuig na sukad nga gitugtan sa Cebu City Council si Mayor Tomas Osmeña sa pagbaligya sa tulo hektaryang luna sa South Road Properties (SRP). Ang presyo: P110,000 matag metro kwadrado.
Matod ni Osmeña nga barato ra ang pagbaligya sa lote sa tag P38,000 matag metro kwadrado sa panahon ni kanhi mayor Michael Rama. Karong Hunyo, magduha na ka mga tuig na ang resolusyon sa Konseho nga nagtugot kang Osmeña sa pagbaligya sa tulo ka hektaryang lote.
Makatulo na usab naoktaba ang bidding niini. Labing uwahi ning semanaha lang. Duha ka mga developer ang giingong interesado, apan wa moapil una sa bidding tungod sa kadagko sa kwartang rekisito.
Hangtod nga duna nay actual nga mopalit sa mao nga luna, magtuo ra ang mga Sugboanon nga bluff ang estorya ni Osmeña nga dunay mopalit o mosugal pagpalit. Gipalabang ang resolusyon niadtong Hunyo 2017, apan hangtod karon wa pay nipalit. Hain na ang iyang giingon?
Kon duna may mosukol, di gihapon ni maingon nga husto siya sa hingpit kay ang yuta baya mo-appreciate. Hayan gihuwat sa developers nga mosaka pa ang balor sa yuta sa merkado, una pa sila mopalit ug mubobo og puhonan.
Sakto unta kaayo si Osmeña kon niadtong higayuna duna dayoy nipalit sa luna, apan wa man. Mingaw man kaayo.
Lain pa, iyang gitumbok nga alkanse ang Siyudad sa pagbaligya, apan wa niya mahisguti ang mas ubos pa kaayong presyo sa iyang pagbaligya sa mga luna sa SRP sa iyang termino, dihang managkaalyado pa silang Rama.
Mao ra sab ning dagana sa isyu sa basura nga iyang gisaway ug gihulagway pang anumaluso. Sa iyang administrasyon, maorag rocket ang pagsulbong sa gahin kon itandi sa panahon ni Rama. Ambot, wa ba kaha nalipat ang mga Sugboanon ning mao nga mga isyu?