USA ka video nga nagpakita og labing minos unom ka gituohang mga pulis nga nangulata sa tulo ka mga tawo sa gituohang police operation nikatap na online, apan ang hepe sa Talamban Police Station nanghimakak siya ug ang iyang mga tawo ang naa sa video.
Sa usa ka Facebook post, si Cebu City Mayor Tomas Osmeña nitanyag og reward ni bisan kinsa nga makaila sa mga pulis sa video.
Mohatag siya og P100,000 sa matag pulis nga mailhan.
“Gen. Sinas and Col. Garma, ‘legitimate police operation’ na pud ni?... Anyone who can identify the personnel involved in this incident will receive 100,000 for every person identified. Text me directly at 0917 329 9999. Text from a prepaid if you want. I can still give instructions on how to claim your reward once your info is verified. The people behind this will be held responsible,” siya niingon.
Si Talamban police chief Elizandro Quijano nanghimakak nga sila ang naa sa video nga iyang nakit-an online.
“Amo nang’ gi-deny. Ipaklaro usa kon operatives na sa Talamban,” nagkanayon si Quijano sa Sunstar Cebu.
“We have nothing to worry (about). Mag-abot sa korte kon daku-on na nila nga issue,” siya nidugang.
Si Quijano nikompirmar hinuon nga ang iyang mga operatiba nidakop sa usa ka Eddie Basillote, 28, sa usa ka buy bust sa Sityo Nasipit, Barangay Talamban niadtong Abril 18, nga na-record sa police blotter.
Ang video nga nagpakita sa unom ka mga tawo nga nangulata sa tulo ka mga tawo gamit ang kumo, siko ug butt sa ilang Armalite rifle gi-forward ngadto sa Superbalita Cebu sa Huwebes, Abril 25, sa usa ka netizen.
Ang netizen nihangyo nga di nganlan alang sa iyang seguridad.
Ang video makita dinhi: /www.facebook.com/superbalitacebu/videos/582727228880545/.
Gisusi sa Sunstar sa Talamban police station ug base sa police blotter si Basillote nadakpan niadtong Abril 18, 2019 sa Nasipit, Brgy. Talamban sa pagbaligya ug paghupot og illegal drugs.
Nagpakita usab ang blotter nga si Police Staff Sergeant Reoven Carmelo Rotawas, pangu sa Drug Enforcement Unit sa buhatan, maoy nisikop kang Basillote.
Matod sa blotter, ang mga pulis nakakuha kang Basillote og lima ka gagmay nga mga heat sealed transparent plastic sachets nga dunay puti nga crystalline substance nga gituohang shabu.
Si Quijano niingon nga ang ngan ni Basillote kanunay malambigit sa paghupot ug pagpamaligyag illegal drugs.
“Sa mga dinakpan namo, siya pirmi itudlo nga involved,” siya nagkanayon.
Dihang gipangutana kon siya ba ang usa sa tulo ka mga tawo nga naa sa video gikulata, wa motingog si Basillote.
Siya niangkon hinuon nga namaligyag illegal drugs, apan niinsister nga nihunong na siya niadtong 2016.
Nasikop siya sa ilang balay niadtong Abril 18 di sa Nasipit sumala sa mga pulis, kon di sa ilang balay sa Ponce 2, Brgy. Carreta.
Ang netizen nga nipadala sa video nikompirmar usab nga sa Ponce Compound ang pagdakop.
Matod sa netizen nga nabalaka ang pamilya ni Basillote sa ilang seguridad.
“Niundang na ko pagbaligya pag 2016. Pero wala ko ni-surrender sa tokhang,” si Basillote niingon.