SUPERBALITA CEBU

Ulan posibleng masinati sa Dominggo, Abril 28

CEBU. Gitudlo ni Pagasa- Mactan weather specialist Romeo Aguirre ang pundok sa mga panganod gawas sa Pilipinas nga maoy posible magdala og ulan sa Mindanao ug habagatang bahin sa kabisay-an. (Hulagway kuha ni Fe Marie Dumaboc)

GILANTAWAN nga makasinati og pag-ulan ang Mindanao ug makaambit ang pipila ka bahin sa habagatang’ kabisay-an karong umaabot Dominggo sa hapon, Abril 28 o Lunes sa buntag, Abril 29, matud Philippine Atmospheric, Geophysical and Astronomical Services Administration (Pagasa)- Mactan, Cebu.

Sulod na sa kapin duha ka bulan nga grabe kainit sa panahon ang nasinati, gani moabot na ngadto sa 42 o 43 degree Celsius ang kainiton nga mabatyagan sa tawo o heat index, halos kada-adlaw sukad sa niaging tulo ka semana.

Ug sa bulan sa Mayo gilantawan na sa buhatan sa Pagasa- Mactan nga grabe pa unya kainit sa panahon ang masinati ug grabeng huwaw pa ang nasinati sa pipila ka bahin sa nasud.

Sa kabisay-an, gilantawan sa Pagasa- Mactan nga posible nga mabahinan ang Sugbo og mga pag-ulan sa Dominggo sa hapon, sa gabii o di ba kaha karong Lunes, Abril 29.

Human nga mga pundok sa panganod o cloud cluster nga anaa pa sa Pacific Ocean ang nasigpatan nga moagi sa nasud karong tapos sa semana nga magdala og mga pag-ulan.

Ang Mindanao, matud ni Romeo Aguirre ang weather specialist, nga dako ang kahigayunan nga ma-grasyahan og ulan ning weekend.

“Maayo nga panahon gihapon ta karon hangtud ugma, o init gyud ang panahon, pero anaa tay gi-monitor nga cloud cluster sa kadagatan gawas sa nasud nga kon dili lang mahilis makadala gyud ni og pag-ulan sa Mindanao, ug mag-ampo ta nga mosaka siya gamay aron mabahinan ang Visayas,” asoy ni Aguirre.

Hinuon ang maayo nga panahon, maayo usab alang sa mga kalihukan sa Sugbo, sama nalang sa re-enactment sa kadaugan sa Mactan Sabado sa buntag, Abril 27, sa dakbayan sa Lapu-Lapu, nga himuon sa baybayon sa Mactan Shrine, diin gitug-an ni Aguirre nga dili ra baluron ang kadagatan.

Dili ra usab ulanon ang overnight nga kalihukan sa National Youth Day sugod Sabado sa hapon sa Cebu City Sports Center, nga tapuson sa Dominggo sa buntag.

Apan subli nga pahimangno ni Aguirre nga ang maayo nga panahon, dili usab maayo kon magpalabi og bulad sa kainit sa adlaw.

“Kon dili gyud kalikayan nga adunay outdoor activity, mas maayo nga magdala og payong kay para nani sa init o sa kalit nga pag-ulan, ang suot mas maayo nga white o de-kolor light shirt, and kanunaya ang pag-inum sa tubig, kay usa gyud na sa makatabang gikan sa grabeng init,” dugang tambag ni Aguirre. (FMD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph