CHITO E. GERMINO
Paknaan, Mandaue City, Cebu
MAY gihusay sa dakong hukmanan
Migawas na ang di malisong hukom.
Tungod sa akong dakong kalapasan
Ngamig ang bungbong nga lagom,
Puno sa mga singgit ug tiyabaw.
Naputos ko sa kahilom nga makabungol
Gininhawa ko lang ang may kasikas.
Nagpasad ang mga demonyo
Nabitik sila sa akong silot
Wa nay pagbalik.
Dinhi walay bugti ang sala
Nanginit akong panit.
Mihangad ako
Gitagoan ang pagdumot sa kahiladman
Nagsugnod sa hakog nga garbo.
Mga dinakpan kita ubos sa kainit sa Adlaw
Nga misidlak lang alang sa pipila kanila.
Kitang mga tanga nagkahiusa.
Midahunog ang dalugdog,
Nakita ko ang lamat nga krus,
Gibati ko ang kahapdos sa lawas.
Ang tigre nagngulob sa kangitngit.
Siya lang ang naggunit sa yawe
Sa kahayag nga nagtangtang
Sa kabug-at ug dapatan
Sa kinabuhing dayon.
Patay na unta ako.
Usa ka Dominggo sa buntag
Naparok ang akong agtang.
Way panahon sa pagbangutan.
Wala na akoy panahon!