GILANGKAT sa San Juan Knights ang kampiyunato pinaagi sa makapakaging nga kadaugan batok sa host Davao Occidental Tigers, 87-86, sa grabe ka kulbahinam nga Game 5 sa championship series sa 2018-19 Maharlika Pilipinas Basketball League (MPBL) Datu Cup niadtong Huwebes sa gabii sa Rizal Memorial Colleges gym.
Sa usa ka salikwaot nga kamatuoran, ang lumad nga taga lungsod sa Magsaysay, Davao del Sur nga si Johnard Clarito maoy nahimong bayani sa kadaugan sa Knights dihang nakapasulod siya og krusyal nga mga puntos sa hinapos nga bahin lakip na niini ang nakapadaog nga puntos.
Sa pagpangulo ni Clarito, ang Knights ningbangon gikan sa pito ka mga puntos nga pagkalubong sa hinapos nga bahin aron pakagingon ang Tigers ug ang nagpunsisok mga sumosunod niini.
Sa katapusang posisyon sa bola sa Knights, si Clarito milusot sa depensa sa duha ka mga sakop sa Tigers aron mugnaon ang nakapadaog nga puntos sa nahabiling walo ka mga segundos.
Sa return play, pakyas ang Tigers pagmugna og puntos.
Gipangulohan ni Mark Yee ang Davao pinaagi sa iyang 27 puntos samtang nidugang og 19 puntos si Bonbon Custodio.
Puntos matag usa:
San Juan (87) - Ayonayon 33, Rodriguez 15, Cardona 12, Clarito 11, Wilson 8, Reyes 4, Wamar 3, Isit 1.
Davao (86) - Yee 27, Custodio 19, Adormeo 12, Calo 10, Terso 5, Ombecan 5, Najorda 3, Lamocha 3, Robles 2. (ESL)