IPAHIGAYON ugma, Dominggo, Abril 28, ang labing unang Sun Life 5150 Triathlon Cebu ug ang Go for Gold (GFG) Sunrise Sprint sa dakbayan sa Naga, Cebu.
Ang 5150 nga triathlon naglangkob sa 1.5 kilometros nga lumba sa langoy, 40 kilometros nga lumba sa bisikleta, ug 10 kilometros nga lumba sa dagan samtang ang Sunrise Sprint anaa kini 750 metros nga lumba sa langoy, 20 kilometros nga lumba sa bisikleta, ug lima ka kilometros nga lumba sa dagan.
Mao kini ang usa sa labing dako nga international distance triathlon series sa kalibutan diin nagtanyag kini og competitive nga plataporma alang sa mga propesyonal ug age group nga atleta lakip na ang mga nagsugod pa sa ilahang karera isip atleta.
“At Sun Life, we aim to provide Filipinos different avenues to enrich their health and wellness journey, whether they are already deep into their fitness goals or are just discovering their passion for it,” matod ni Sun Life Chief Marketing Officer Mylene Lopa.
Mga professional nga atleta sa laing nasod susama nila ni Sam Betten, Dan Brown, ug Mitch Robins sa Australia lakip na usab si Manami Iijima sa Guam ang mangulo sa mga magtigi alang sa $10,000 nga premyo.
Aduna sab sikat nga mga artista sa Pilipinas ang mangapil sa kalihukan sama nila ni Piolo Pascual ug ang anak niining si Iñigo hasta si Enchong Dee.
Siraduhan ang seaside sa dakbayan sa Naga sayo sa kadlawon sa Dominggo diin magsugod ang maong triathlon alas 4:00 ang takna.
Samtang gipahibawo ni Princess Galura, General Manager sa Sunrise Events, nga sa dakbayan sa Naga ra ang maong lumba ug dili na kini moabot pa sa dakbayan sa Talisay o kaha sa lungsod sa Minglanilla.
Si Naga City Mayor Kristine Chiong sa iyang bahin nagkanayon nga mahinungdanon kining maong kalihukan sa ilahang dakbayan.
“It’s a part of our recovery and healing from the deadly landslide which ravaged the city in September 2018. Hosting the event will bring positivity and unity to the community,” ang mayor nagkanayon.