USA ka 7 anyos nga lalake namatay samtang iyang usa ka apohan naangol human masunog ang ilang balay sa Barangay Pakigne, Minglanilla niadtong Biyernes sa buntag, Abril 26.
Human napawong sa kabomberohan ang kayo, ilang nakaplagan ang nasunog nga lawas ni Justin Parsacala, sulod sa lawak niini.
Ang sunog mga alas 10:30 sa buntag, nagsugod sa lawak ni Engr. Nazario Parsacala, lolo sa bata.
Balay sa mga biktima naa sa Belmont Village, usa ka subdivision.
Matod ni Fire Officer 1 Fulbert Navarro sa Minglanilla Fire Station niingon nga sila si Nazario ug iyang asawa nga si Virginia naa sulod sa sala dihang ang ilang fire alarm system naka-detect og aso.
Sa ilang pagsusi sa ilang lawak, napalgan ni Nazario nga dako na ang kayo ug nakahukom silang adtuon ang ilang apo, apan sirado ang lawak niini.
Nakahukom silang manggawas na lang kay nakadaku na ang kayo sa lawak.
Wa sa hitabo ang mga ginikanan sa bata kay nanrabaho.
Gidala si Nazario sa Minglanilla District Hospital human siya mahiagom og second degree burns.
Gidala sab ospital ang iyang asawa tungod kay naglisod og ginhawa.
Gibana-bana ang danyos nga mga P100,000 samtang electrical ang unang gituohang hinungdan. (JKV sa Sunstar Cebu)