HUMAN sa nagmalampuson nga pagsaulog sa Semana Santa, laing kalihukan ang angay nga bantayan sa dakbayan ning higayona nga mao ang Palarong Pambansa.
Sa milabay pang mga adlaw, daghan nang mga atleta ug mga opisyal gikan sa nagkadaiyang rehiyon sa nasud ang niabot dinhi sa Davao alang sa pagsalmot sa kompetisyon nga buksan ugmang adlawa.
Gawas sa mga dagkong opisyal, segurado kita nga duna say daghang mga turista, di lang lokal, apan mga langyaw nga moanhi aron sa pagsaksi sa kalihukan.
Dako kini nga hagit alang sa mga awtoridad aron nga kabantayan sila samtang ania sa dakbayan. Kini maoy hinungdan nga nagdugang og puwersa ang kapulisan, inabagan sa kasundalohan aron nga masegurong di matugaw ang kahapsay ug kalinaw sa mga lugar nga duwaan, ug labaw sa tanan molampos ang kalihukan.
Suportahan nato ang ipatuman nga “security measures” sa kapulisan ug sundalo sama sa atong gibuhat atol sa kasaulogan sa Semana Santa.
Nilampos ang kasaulogan sa kuwaresma sa mga simbahan sa dakbayan sa milabay nga semana gumikan kay ang mga tawo mismo, nisunod sa mga patakaran ug sumbanan nga gipatuman sa pulis ug sundalo.
Mao pod unta kini ang buhaton nato ning higayona sa usa sa mga dakong kalihukan dinhi sa dakbayan.
Ang pagtinabangay sa mga awtoridad ug katawhan moresulta gayud sa kalampusan.
Napamatud-an na nato kini sa nanglabay nga panahon, di lang sa kuwaresma.
Ubanan sab nato og pag-ampo kay kon mosalig lang kita sa atong kaugalingong paningkamot, makawang lamang kini kay kinahanglan man gyud nato ang giya sa Kahitas-an.