LABIHANG daghana sa mga bisita nga nia karon sa Sugbo. Ang liboan ka delegado sa National Youth Day di mabangbang ang ilang gidaghanon. Pun-an pa sa mga langyaw ug lokal nga turista.
Gani pagkahuman sa Semana Santa way puas ang pagdagsa sa mga bisita sa nagkadaiyang baybayon ug ubang tourist destination.
Ang isla sa Bantayan maoy rumbo karon sa akong mga kaliwat gikan sa Metro Manila. Naapil sab sa ilang listahan ang ubang dapit nga abunda sa mga nindot nga talan-awon lahos na ngadto sa mga isla sa Bohol, Negros ug Siquijor. Kay di man ko ka kuyog ang ako nalang pahimangno kanila nga magmabinantayon kanunay sa ilang mga personal nga gamit. Ug ang lain nakong gipanghinaot nga unta di sila mabiktima sa mga mapahimudsanon.
Kining subra ra sab nga bayronon sa mga serbisyo, pletihan ug uban pa usahay makaingon ta nga klaro kaayong pagpahimus batok sa mga bisita.
Manghinaot ta nga ang mga lokal nga kagamhanan nakat-on na og leksyon nga ang pinaka epektibo nga advertiser sa ilang dapit ang ila ra sab nga mga bisita. Kong makauyon sila sa serbisyo ug pasilidad nga way sagul lubag, sila rasab ang mangunbenser sa ilang mga kaliwat ug higala pagbisita sa ilang naadtoan. Pero kong sa bayranan sa parking palang daw sa gihimo silang gatasan sigurado ko nga mahimo kining dakong isyu nganong di na sila ganahang mobalik og pulos bati ang isulti ngadto sa uban. Sa habig sa mga delegado sa National Youth Day sigurado ko nga dunay daghan nila ang nagplano nga manuroy unyag human sa ilang kalihukan.
Mao ning bahina nga mas pahugtan pa sa kapulisan ang ilang monitoring batok sa mga kiriwan. Usa ka delegado nga mabiktima og krimen pagan gyud tanan ninyong paningkamot. Basin modangop lang sab mo dayon sa karaang panagang nga isolated case ra ang nahitabo.
Tukma nga koordinasyon og mga pasidaan nga himoon sa mga tinugyanan sa simbahan maoy nag-una nga panginahanglan aron sa mga badlongon di sila madisgrasya.
***
Minilyon ka pesos na nga balor sa pananom ang gireport nga napurnada tungod sa nagpadayon nga huwaw. Wa pa ni labot sa minilyon ka pesos nga alkanse sa mga negosyo nga apektado tungod kay nagsalig sa tubig. Pananglit ang usa ka water refilling station nga nagsalig sa tubig sa MCWD.
Asa man siya og i-process nga tubig kong ang supply di sab sigurado? Mao siguro ni hinungdan nga dunay mga refilling station nga wa na mag-operate. Kanang sige pa ang operasyon ang uban nila may kaugalingong tinubdan sa tubig. Pero hibaw-i nga kong magpadayon ang huwaw mo-us-us sab ang level sa tubig diha sa mga tinubdan maoy hinungdan nga ang water pump wa nay masuyop basi sa iyang kapasidad.