SECTIONS
Wednesday, May 22, 2019
SUPERBALITA CEBU

Albor: Sonny kasohan og plunder

Sandiganan

NAGSAGUBANG og inbestigasyon si Toledo Mayor Sonny Osmeña ug pito ka kaubang opisyal kabahin sa kasong plunder nga 210M pesos sa Clean and Green Program.

Sa 38 ka mga kapitan 21 kanila miduyog ni Manlalaban Pablo John Garcia pagsumbong sa Ombudsman. Ang maong pundo gigamit sa pagpasulod og mga job order employees sa 38 ka barangays alang sa Clean and Green pinaagi sa tulo ka hugna sa supplemental budget gikan sa Mayo 2018 ngadto sa Okt. 2018 bisan ang COA mipahimangno human makabantay nga kadudahan ang pagpagawas sa salapi. Gumikan sa dakong kantidad tataw unta nga limpyo ug hapsay ang talan-awon sa Toledo.

Apan namatikdan ang kahugaw sa nagkatag ug nagliundok nga mga basura. Migrabi ang kahimtang sa sanidad nga peligro sa panglawas ug hulga sa kinabuhi nga kinahanglang molihok ang Environmental Management Bureau (EMB) 7 sa gisangon nga kaakohan. Sitwasyon nga makapangutana ang mga lomolopyo kon asa paingon ang 210M pesos sa gigahin nga pundo.

Sa tag 350 pesos ang adlaw nakwentada nga miabot og 4,760 ka mga job order employees ubos sa Clean and Green Program. Apan kon pangutan-on ang mga residente walay timailhan nga nanarbaho sa barangays ilabina sa naghinapos nga bahin sa 2018. Gitikasan ang kagamhanan. Nagnegosyo og katahap.

Mga nagpakabanang kawani sa Toledo mitugyan sa mga dokumento ngadto ni Garcia. Sa detalyadong sulat nga gisang-at sa Ombudsman ang Clean and Green Program giimplementar sa pipila ka mga opisyal ubos ni Mayor Osmeña.

Nanguha og abat nga mga empliyado o ghost employees sa tulo ka mga kategoriya nga mao ang fictitious persons, tinuod nga ngalan nga wala mahibalo nga gilista ug tinuod nga ngalan nga wala bayri uban gisaaran nga hatagan og ubos sa dies porsento basi sa suholan. Ang pipila ka mga opisyal maoy nakabulsa sa bulto nga kantidad ubos sa pagpangulo sa mayor. Unsa diay ning sweldo sa JO sa Toledo adto ra pod diay anang ginganlan og J.O., tuaw sa mga lomolopyo. Gimatuod sa gisuporta nga mga dokumento.

Gimao-mao ang signatures sa kinatibuk-ang payroll ug natataw nga gipirmahan lamang og usa ka tawo. Busa gikinahanglan ang gahom sa Ombudsman pagsiksik sa kinauyokan ilabina nga namatikdan nga ang maong salapi gihaylo ni Osmeña sa mga botante sa ikatulong distrito. Nasagmuyo ang taga Toledo kay gigamit sa politika ang ilang buhis. Gilaoman nga ang Ombudsman sa gisangon nga gahom ubos sa balaod modirekta nga hunongon na ang maong programa aron kaprotihian ang interes sa gobyerno. (csa_1156@yahoo.com/09064648954)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!