DALI ug hugtanon gilayon nga gipanghimakak ni Police Major Elisandro Quijano, hepe sa Talamban Police Station, nga sila, o iya kadtong mga tawo, ang nakita sa nikatap nga video nga nangulata atol sa giingong police operations.
“Amo nang’ gi-deny. Ipaklaro usa kon operatives na sa Talamban,” kini maoy gitubag ni Quijano sa interview sa SunStar Cebu. “We have nothing to worry (about). Mag-abot sa korte kon daku-on na nila nga issue.”
Apan iyang gikompirmar nga ang iyang mga operatiba nidakop ni Eddie Basillote, 28, atol sa buy bust sa Sityo Nasipit, Barangay Talamban niadtong Abril 18 (Huwebes Santo). Kini natala sa police blotter.
Anaa usab sa blotter nga si Police Staff Sgt. Reoven Carmelo Rotawas, pangulo sa Drug Enforcement Unit sa maong police station, maoy nagdakop kang Basillote.
Makita sa video ang unom ka mga armado nga nagsibilyan ug grabe nga nakapangulata sa tulo ka mga tawo.
Dili kay mga kinumo lang, kon dili giugbokan usab kini og siko sa makadaghang higayon, giduslak sa armalite ug gitabangan og patid-patid kadtong usa sa tulo nga gipangkulata.
Masabot nga kini nahitabo sulod sa usa ka internet café tungod kay aduna may daghang naglumbay nga lamesa ug mga computer.
Ang video nga nikatap adunay petsa nga Abril 18 (Huwebes), susamang petsa sa giingon ni Quijano nga sila nipahigayon og buy bust operation. Ug ang tawo nga maoy gidakop nga nakita sa maong video giingong mao usab si Basillote.
So, kon dili mga pulis, kinsa man diay kadtong mga tawhana? Posibli ba diay na nga adunay managlahing hitabo sa susamang dapit, susamang panahon, ug susama usab ang tumong?
Mora og kini maoy gustong ipalutaw ni Quijano nga lisod tuohan. Atong paabuton ang resulta sa imbestigasyon.