ANG Commission on Human Rights (CHR) 7 wa hatagi og access sa police blotter ug police report atol sa ilang pag-imbestigar sa video nga naglambigit sa giingong mga pulis nga nangulata sa drug suspect nga si Eddie Basillote.
Si CHR 7 Regional Director Arvin Odron niingon nga ang mga imbestigador wa makakuha sa mga ngan sa sa operating officers kay wa sila tugoti nga makatan-aw bisan sa logbook.
“Ang amoa na lang unta bisag sa police blotter na lang pero wa jod gihatagan og access,” matod ni Odron.
Si Odron niingon nga ang ilang team wa hatagi og access kay matod sa mga pulis, nagsunog lang sila sa mandate sa ilang taas nga opisyal sa di paghatag og mga dokumento sa CHR.
Giluwatan kini niadtong 2017 ni kanhi Philippine National Police (PNP) chief Ronald “Bato” de la Rosa, nga di mohatag og mga dokumento ngadto sa CHR alang sa case build-up.
Mga imbestigador, matod ni Odron, niadto sa dapit diin giingong nahitabo ang video ug nakaestorya sa mga saksi ug pamilya ni Basillote.
Sa ilang imbestigasyon, si Odron niingon nga dunay duha ka mga alegasyon.
“Ni-claim ang kapulisan nga buy bust. Niana si Basillote nga way buy bust. Nagduwa ra daw sya nya kalit gidakop,” nagkanayon si Odron.
Kining mga alegasyon ilang susihon sa CHR sa Lunes.
Matod ni Odron nga mangita sila og laing paagi aron pagkuhag impormasyon, ingon man pag-ila kinsa kining mga tawo nga nangulata.
GIIMBESTIGAR
Ang hepe sa Talamban Police Station ug mga sakop gipaubos sa imbestigasyon human nikatap sa social media ang video sa tulo ka mga tawo nga gikulata sa giingong mga pulis niadtong Huwebes Santo, Abril 17, sa Ponce Compound, Barangay Carreta, Dakbayan sa Sugbo.
Usa sa tulo gitumbok nga mao si Eddie Basillote, kinsa nalakip sa drug watchlist sa kapulisan sa Siyudad sa Sugbo.
Gikan sa Talamban Police Station, si Basillote gibalhin na sa headquarters sa Cebu City Police Office (CCPO) Biyernes sa hapon, Abril 26.
Gitahasan ni CCPO Director Police Col. Royina Garma ang Investigation and Detective Management Branch sa pag-imbestigar sa labing dali nga panahon.
Iya usab nga gipaduso og report si Police Major Elizandro Quijano labot sa operation.
Si Garma nipahibawo sa Superbalita Cebu nga si Quijano nakaduso nag report sa Biyernes sa hapon, apan wa pa niya matan-aw ang nasuwat niini.
Matod ni Garma, di pa siya makasulti kon ang naa sa video ang mga pulis ba sa Talamban tungod kay wa maka-uniporme.
Gitinguha niya nga makuha ang orihinal nga tinubdan sa video aron mapa-enhance sa Cyber Crime Group 7.
Iyang gihulagway nga seryuso ang alegasyon nga pulis ang naghimo niini ug di makataronganon nga hinimoan, kana kon iyang sakop ang naghimo niini.
Kinahanglan pa nga subayon ang tanang kuha sa video gikan sa sinugdanan hangtod sa katapusan.
Sa police blotter, nakasuwat nga alas 6 sa buntag sa Abril 18 ang giingong buy bust nga nahitabo sa Sityo Nasipit, Barangay Talamban.
Apan si Basillote nga nahinabi sa SunStar Cebu, niingon nga pasado alas 11 gabii sa Abril 17 sa ilaha sa Ponce 2, Brgy. Carreta nahitabo ang giingong buy bust.
Niana nang pasado alas 12 sa kaadlawon sa Abril 18 siya gidala sa mga pulis.
Gawas kang Basillote, makita sa video nga gipadala sa Superbalita Cebu sa usa ka netizen nga tulo ka mga tawo ang gipangkulata, duha kanila wa dad-a sa mga pulis.