MIPOSTE og playoffs career-high nga 50 puntos si Kevin Durant aron agakon ang back-to-back defending champion Golden State Warriors sa kadaugan batok sa host Los Angeles Clippers, 129-110, sa Game 6 nga maoy nagtiklop sa ilang 1st round series, 4-2, kagahapon sa National Basketball Association (NBA).
Sayong nanginit ang mga kamot ni Durant ug nakarehistro na dayon kini’g 38 puntos sa 1st half apan bisan pa niini, daw dili pa kuntento ang kanhi MVP sa iyang gipakitang duwa.
“I scored 50 points but I missed some good shots. I thought I could have made a few more,” matod ni Durant.
Ang Warriors ning-abante sa Western Conference semi-finals series diin naghuwat kanila ang Houston Rockets.
Sa miaging tuig, nagtagbo ang duha ka mga kampo sa Western Conference finals diin nakabangon ang Warriors gikan sa 2-3 nga biya aron dag-on ang kulbahinam nilang series, 4-3.
Ang 38 puntos ni Durant sa 1st half nakatabla sa ikaduhang dapit sa labing dako nga puntos nga nahimo sa usa ka magduduwa sa nag-unang duha ka quarters sa kasaysayan sa playoffs.
Sa pagpangulo ni Durant, ang Warriors nakamugna og 72-53 nga labaw sa halftime diin ning mga gutloa, nakaposte na si Durant og 12-of-17 fieldgoal unya wala siya’y sipyat sa 10 ka freethrows.
“That was one of the great performances I’ve ever seen in my life,” asoy ni Warriors coach Steve Kerr kabahin kang Durant. “He’s the ultimate weapon because there’s no defense for Kevin.”
Ang Clippers, nga ningbuntog sa Warriors, 129-121, sulod mismo sa tugkaran niini sa Game 5, wala nakasugakod sa gimangtas nga gipakitang duwa sa Warriors gawas lang sa sayong bahin diin nakakulit sila og 18-8 nga labaw.
Gikan sa 10 ka puntos nga biya sa ika 6:55 sa 1st quarter, ang Warriors ningpabulhot na sa ilang opensa hangtod nga nakontrolar na nila ang duwa.
Hinuon alang sa Clippers, wala sila’y angayang ikauwaw sa ilang kapakyasan gumikan kay nakapakita sab sila og labok batok sa labing gikahadlukang puwersa sa liga.
“We took the back-to-back champions to six games,” asoy ni Clippers guard Patrick Beverley. “We hold our heads high.”
Si Stephen Curry nidugang og 24 puntos alang sa Warriors samtang nitampo og triple-double si Draymond Green nga 16 puntos, 14 rebounds ug 10 assists.
Ang Clippers gipangulohan ni Danilo Gallinari pinaagi sa iyang 29 puntos samtang nidugang og 22 puntos si rookie Shai Gilgeous-Alexander.
Sila si Lou Williams ug Montrezl Harrell, nga mao unta ang highest-scoring bench combo sa liga, parehong ngil-ad nga nakaduwa. (AP, ESL)