MOSAGUBANG og malisod nga tahas karong gabii si ALA fighter Jonas Sultan nga magsilbe niyang agianan aron makapanuktok og balik alang sa world title.
Ang gitawag og ‘Zorro’ makigbatok kang South African Athi Dumezweni alang sa inilugay sa bakanteng World Boxing Council (WBC) Silver super flyweight strap sa Orient Theatre sa East Cape.
Sa interbyu sa Sun.Star Cebu, nagkanayon si Sultan nga iyang buhaton ang tanan niyang makaya aron modaog.
Gipasabot ni Sultan nga kinahanglan niyang moagresibo ning awaya ug kon adunay kahigayunan, iyang matikangkangon si Dumizweni.
Ang 27 anyos nga si Sultan unang nakapanuktok sa world title sa miaging tuig diin gisuwayan niya pag-ilog ang korona sa kababayang si International Boxing Federation (IBF) super flyweight king Jerwin Ancajas sa Fresno, California.
Napakyas si Sultan ning maong tahas pinaagi sa unanimous decision. (EKA, ESL)