GILAUMANG moinit og balik ang hugot nga panagribal sa duha sa labing bantugang riders sa Sugbo nga sila si BJ Pepito ug Jonjon Adlawan sa 2019 Mayor Joven Mondigo Invitational Motocross nga ipahigayon karong adlawa sa lungsod sa Medellin, Cebu.
Sa miaging duha ka mga semana, parehong ningbida sila si Pepito ug Adlawan sa ilang pagsalmot sa 21st Calambua Motocross Cup sa Calambua, San Remigio.
Ning maong lumba, naangkon ni Pepito ang expert division samtang nasakmit ni Adlawan ang korona sa pro open category.
Apan dili angayang molugak sila si Pepito ug Adlawan ning higayuna gumikan kay seguradong nangandam ang ubang mga partisipante sa pag-ilog sa titulo.
Gawas sa pro open ug expert, ang ubang mga kategoriya nga kombatihan mao ang local enduro, beginners production, mini class 50cc and 85cc, intermediate, novice open production, ladies open, underbone ug buggy class.
Ang MS Motosuit nga gipanag-iya ni motocross patron Lou Ornopia nakigtambayayong sa Medellin LGU nga gipangulohan ni mayor Benjun Mondigo alang sa pagpasiugda ning maong lumba.
Naghatag og suporta sa lumba mao ang MSY Holdings Corporation, CLS Properties, Martin Salimbangon Yeung, congressman Benhur Salimbangon, Alex Patino, Edwin Dilao, Gonzalodo Enterprises, Duros Development Corp., Elton Salimbangon, Engr. Godofredo Laga, Jr. ug Liga ng mga Barangay President Edwin Salimbangon. (ESL)