ANG akong kauban nga editor sa Superbalita Cebu, Dr. Rolando “Dodong” Morallo usa sa mga sakop sa media sa Cebu nga gipasuway sa pagpa-drive sa bag-ong mga modelo sa Ford Ranger. Kay four-wheel drive lagi ang mga sakyanan, gipamaneho sila sa kabukiran, sa lisod nga mga karsada.
Matod ni Dodong, nindot kaayo ang kabukiran ug mga talan-awon. Sa kapin sa 20 ka tuig niya sa Cebu, kadto pa siya nakasuroy sa kabukiran sa Dakbayan sa Sugbo ug lungsod sa Balamban.
Ako siyang giingnan nga sagad sa ilang gipang-agian nga mga karsada, maoy amoang rota sa mountain biking. Didto pa siya naka-appreciate sa kaanindot sa mga talan-awon ug kaabunda sa kaumahan.
Wa pa gani siya makakita sa uban pang suok nga mga dapit nga biyahian sa mga mountain biker. Ako siyang giingnan nga usa na sa mga katarungan nganong ganahan ko og mountain biking, kanang talan-awon nga akong makita bisan tuod kon kutas ang pagtungas. Kana ganing makaingon ka og wow!
Kapoy tuod ang mountain biking, apan kon maanad ka na og tungas, imo rang ibaliwala ang kasakit sa body parts, labina sa muscles nga kanunay nimong gigamit sa pagtindak, sama sa mga paa, apil na ang mga bukton nga gigamit sa pangusog sa patimbang.
Di makatulog
Sa una nakong biyahe gikan sa amoa sa Bacayan padulong sa Carcar City, di nako ma-describe ang kasakit sa akong kalawasan. Bisan tuod kon kasagaran patag ang amoang gisubay ni Allan Defensor, apan ang kalay-on niini nga wa nako pa masuwayi mao ang hinungdan sa grabeng kasakit sa akong kalawasan.
Ang nakapait, wa ko hapit makatulog bisan sa kakapoy tungod sa nagngolngol nakong muscles. Di man ko tigtumar og mga tambal mao nga giagwanta ra nako ni. Basta molihok ang muscles unya wa pa maka-adjust, manakit man gyud ni. Apan ang kalipay di usab kabayran baya. Sa ikaduha nakong pagbalik sa Carcar City, wa na nako batia ang kasakit sa kalawasan.
Ayaw kahadlok
Sama nako, dunay uban nga mahadlok mobahada o modulhog. Apan di sab ko grabe ka hadlukan. Nakakita na ko og mga biker nga naaksidente tungod kay nahadlok sa pagdulhog.
Kon maratol ka, padung ka gyud madisgrasya. Dihay makausa nga naratol ko kay grabe na ko kakapoy dihang nakalimot ko nga dunay rain ruts, kanang mga kanalkanal sa dan nga giagian sa tubig sa uwan.
Naratol kog kadiyot hinungdan nga hapit ko malamba, apan dali ra kong nakabawi. Tingali, kon wa pa koy presence of mind, posibleng nalamba ko ug hayan dakog samad. Busa, diha importante ang presensya sa huna-huna ug di magpadala sa kahadlok aron di madisgrasya.