Binasi sa Mga Buhat 5:12-16; Salmo 118; Gipadayag 1:9-13, 17-19; Juan 20:19-31
NIADTONG Mayo 5 tuig 2000, lima ka adlaw human giila nga santa ang usa ka madre nga taga Poland nga si Sr. Faustina Kowalska, gitukod ang Pangilin sa Diosnong Kaluoy (“Divine Mercy”) ni Papa San Juan Pablo II. Pagasaulogon kini matag ikaduhang Domingo sa Pasko sa Pagkabanhaw ni Jesucristo. Maka-14 nga higayon gipatik diha sa “diary” ni Faustina ang mando gikan ni Jesus nga pagatukoron ang maong pangilin.
Sumala sa maong “diary”, ginikahanglan ang pangilin kay napalong ang pagtuo sa Dios sa Siglo 20 ug, tungod niini, napalong usab ang pag-ila sa kahalangdon sa kinabuhi sa tawo. Makita kini sa Ikaduhang Gubat sa Kalibotan, ang kaulipnon ilalom sa komunismo, ug ang paglaglag sa mga bata sa sabakan ug bisan sa mga bag-ong natawo.
Mipasalig si Jesus: “Mitumaw kining Kasaulogan gikan sa kahiladman sa Akong kalooy, ug napamatud-an kini sa halapad nga kaluoy sa Akong mga malumong kaluoy. Ang matag kalag nga nagatuo ug nagasalig sa Akong kaluoy makadawat niini.” (Diary ni San Faustina, 420). Midugang atong Ginoo: “Bisan kinsa nga mag-ampo niini (‘chaplet’) makadawat og dakong kalooy sa takna sa kamatayon...Bisan kon adunay usa ka labing gahi nga makasasala, kon mag-ampo siya niini, makadawat siya og grasya gikan sa akong walay kinutobang kaluoy. Gitinguha ko nga ang tibuok kalibutan mahibalo sa akong walay katapusang kaluoy” (Diary, 687).
Nagpakita si Jesus ngadto sa mga nahabiling tinun-an nga nangahadlok sa mga kadagkoan sa Judio. Kaluoy ang gihatag niya kanila: “Ang kalinaw maanaa kaninyo...Dawata ninyo ang Espiritu Santo. Kang bisan kinsang mga sala nga inyong pasayloon, kini gipasaylo; kang bisan kinsang mga sala nga dili ninyo pasayloon, kini dili pasayloon”.
Ang kaluoy nga gihatag mopadangat og kalinaw. Magkauban man god ning kawalay kalinaw ug ang kawalay pagtuo. Mopadangat og kalinaw ang pagtuo. Mao nga giawhag ni Jesus nga motuo kaniya sila nga mga nangahadlok. Ang mopasaylo maantigong “mobuhi” sa uban. “Gibuhian” ni Jesus ang mga kalapasan sa mga tinun-an. Sila, sa ilang bahin, maantigo usab nga “mobuhi” sa kalapasan sa uban. Niining paagiha mapadangat ang kalinaw sa kalibotan.
Tungod sa gahom sa pagpasaylo nga gientregar ni Jesus sa Simbahan, mabasa nato sa Mga Buhat nga “misamot kadaghan ang mga tawo nga nanuo sa Ginoo ug nahidugang sa ilang pundok”.
Gipadayag sa Nabanhawng Jesus ang iyang kaluoy ngadto kang Juan, ang manunulat sa Ang Gipadayag. “Sa pagkakita ko kaniya natumba ako sa iyang tiilan daw patay” ang nahitabo ni Juan. Nalisang siya. Apan miingon ang Ginoo: “Ayaw kahadlok! Ako ang sinugdan ug ang kataposan. Ako ang buhi! Namatay ako, apan, tan-awa, buhi ako ug dilil na gayod mamatay”. Dili malupig sa kamatayon ang kaluoy sa Dios.