Legario: Luyaha siya sa imong gugma

ADUNAY istorya sa duha ka magsuon nga tungod sa ilang mga asawa, nagkabikil sila. Tapad lang ang ilang mga yuta nga ginabasak, ug gimingaw ang ilang mga silingan magtan-aw kanila nga mag-istoryahanay matag-hapon. Wala nay istoryahanay, wala nay tunulay og sud-an, wala nay tabangay sa pagtanum og humay, ug wala nay katawa nga madunggan ang mga silingan.

Usa ka adlaw, ang ilang pastor nibisita sa magulang nilang duha. Ug inubanan sa tabang sa Ginoo, nakahuna-huna ang magulang nga iyang responsibilidad nga puyukon ang iyang manghod aron mag-uli silang duha. Busa, nagsugod siya og himo og usa ka pamaagi nga mapuyok niya ang kasingkasing sa iyang manghod.

Sama sa giingon sa iyang pastor, ang magulang nagkuha og usa ka sakong humay ug gipas-an padulong ngadto sa bodega sa iyang manghod, tunga-tunga sa gabii aron dili makita sa iyang manghod. Kanang gab-ihona, nakatulog siya nga adunay pahiyom sa iyang kasingkasing.

Pagka-ugma, sa iyang pagbisita sa iyang kaugalingong bodega, nakuratan siya nga sa iyang pag-ihap sa iyang mga sinako, wala may nakaltas sa iyang mga humay. Nahibulong siya pag-ayo.

Pagka-gabii, nipas-an na pod siya og usa ka sako ug gihatud ngadto sa iyang manghod. Pagka-ugma, mao ra gihapon ang nahitabo- walay nabawas sa iyang humay.

Human usa ka semana nga sige siya og himo ato, iyang gipalangan ang iyang paghakwat sa sako, ug naghatud sa humay ngadto sa iyang igsuon alas dos sa kabuntagon.

Ug nakahunong siya tunga-tunga sa dalan kay iyang nakita ang iyang manghod nga padulong pod kaniya ug nagpas-an sab og sako sa humay.

Silang duha diay, sako nga humay nagpinas-anay, aron ilang mga kasingkasing maglukmay, ug silang duha magpinasayloay.

Unsa mang klase sa kasuko o pangluod ang dili matunaw nianang klase sa gugma? Kinsa mang kasing-kasing ang dili mahumok nianang klase sa pagpalangga?

Matud pa ni Ginoong Jesus, pinaagi ni Pablo, “Kung ang imong kaaway gigutom, pakaona; kung siya giuhaw, paimna, ayaw palutos sa kadautan, apan dauga ang dautan pinaagi sa paghimo og maayo” (Roma 12: 20, 21).

Ang tawhanong prinsipyo lahi pod. Ang imong kontra, kulataha; iyang mata, bulaga; iyang tiil, pianga; iyang kamot, putla; kung makalugar, bitaya; ug kung mosukol pa, patya. Mao niy himuon sa tawo ngadto sa iyang kaaway kung pasagdahan lang niya ang iyang gibati.

Mao ni nga nagakinahanglan gayud kita sa kasing-kasing ug batasan nga Diyosnon. Kay ang angay natong buhaton sa uban, sukwahi sa atong pagkatawhanon nga naandan. Mao nga atong dapat hinumdoman: Kinahanglan gayud ang pagka-Diyosnon aron magkinabuhi nga Diyosnon. Ang Diyos magtabang kanato samtang kita magakinabuhi sa Iyang kinabuhi sa gugma.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph