GILAUMAN nga modagsa karong adlawa ang dagkong opisyal sa gobyerno ug mga inilang personalidad sa paugnat sa kusog aron sa pagsaksi sa pagbukas sa Palarong Pambansa 2019 nga mahitabo sa Davao City-University of the Philippines (UP) Sports complex.
Gawas kang Pangulong Rodrigo Duterte isip maoy halandong mamumulong ug mga opisyal sa kagamhanan, gilauman nga motambong sab ang mga inilang personalidad sa isports nga pangunahan nila ni Pambansang Kamao Manny Pacquiao ug Elma Muros-Posadas ug daghan pang uban.
Ang usa ka semana nga kompetisyon gilaumang nga mohatag og 15,000 ka mga tawo, naglakip sa mga atleta, coaches, ug mga opisyal sa duwa nga nagagikan sa 17 ka mga rehiyon sa nasud.
Tungod sa dakong aktibidad, andam na ang mga awtoridad sa gilatid nga mga “measures” alang sa seguridad sa lugar aron nga malikayan pagyagaw ug ang wala damha nga mga dautang hitabo ning adlawa.
Dunay gipatuman karon nga lakang ang kapulisan sa siyudad sa Davao sa lugar nga angay nga tumanon sa publiko nga buot mosaksi sab sa kompetisyon.
Kini ang pagdili’g dala og backpacks. Mga transparent lang nga bag ug water bottle ang tugotan.
Gihangyo sab ang publiko nga magdala og identification card (ID).
Angay sab nga obserbahan ang liquor ban ug uban pang mga ordinansa sa dakbayan.
Apil nga gidili ang mga mahait nga hinagiban ug mga pusil, nga kabahin sa election gun ban.
Unta ang tanan motuman sa maong patakaran ug sumbanan nga gilatid sa mga awtoridad alang sa hapsay ug malinawon nga paglusad sa Palarong Pambansa dinhi sa dakbayan.