TACURONG CITY -- Patay ang usa ka kandidato sa pagka-bise mayor human giatake sa highblood alas 2:20 sa hapon, Biyernes, Abril 26.
Giila ang namatay nga si Incumbent Municipal Councilor Alimudin “Butch” Diarol, kandidato sa pagka-bise mayor sa Kalamansig, Sultan Kudarat, ilawom sa Partido Demokratiko Pilipino (PDP).
Sa taho gikan sa kapulisan sa Kalamansig Municipal Police Station, nasayran nga nangampanya si Diarol uban ang iyang mga ka-partido ug taga-suporta.
Kalit lang nalipong ang biktima gumikan sa kainit sa panahon.
Dali siyang gitabang ug gihatud ngadto sa Lebak Doctors Hospital apan gibalhin dayon ngadto sa Cotabato Regional and Medical Center (CRMC) sa Cotabato City apan gideklara siya sa doktor nga dead on arrival.
Nagpaabot dayon sa pahisubo si Sultan Kudarat Governor Pax Mangudadatu sa pamilya ni Diarol ug sa mga taga-suporta niini.
Samtang nagpasidaan ang Department of Health (DOH)-Soccsksargen sa katawhan nga dili magpainit gumikan dili kini maayo sa lawas ilabi na sa nasinatian nga hulaw. (Edgar E. Fuerzas)