PLANONG iduso sa usa ka party-list group nga nagapapili karong eleksiyon ang pagbalik sa subject nga History sa mga tulunghaan ug pakusgan pa kini pinaagi sa mas lawom nga pagsabot sa kasaysayan sa Pilipinas.
Sumala sa tigpamaba sa Juan Movement Party-list No. 31 nga si Arnell Ignacio nga dako og papel ang kasayuran sa matag Pilipino nga masayod kini sa tinuod nga kasaysayan sa Pilipinas dalan nga masinati gayod ang diwa sa pagka-Pilipino.
Si Arnell Ignacio kanhi opisyal sa Pagcor ug nahimo sab nga deputy administrator sa Overseas Workers Welfare Administration (OWWA) diin gatusan ka mga overseas Filipino workers ang natabangan niini gikan sa mga amo nga nangabuso kanila.
Gibutyag ni Ignacio nga sa pagkakaron, kadaghanan sa mga Pilipino ang wala na nasayud sa kasaysayan sa Pilipinas nga nakita niyang dakong problema ilabina sa mga kabatan-onan.
Dako suma pa ang papel ang kasaysayan alang sa paghulma sa usa ka matarong nga lumulupyo ilabi na ang kasayuran sa mga tradisyon ug kultura nga naandan sa mga Pilipino nga hinayhinay na nga nalimtan ug nawala.
Dako ug pagsupak ang Juan Movement Party-list sa pagtanggal sa subject nga History sa mga tulunghaan, diin ang maong partylist nabalaka nga basin unya makalimtan na sa nagtubong henerasyon ang mabulukon nga kagikan sa Pilipinas.
Kung anaa ang kahigayonan, magpanday sila og balaod alang sa edukasyon ug uban pa nga sektor nga apil sa ilang ginarepresentar.
Si Presidente Rodrigo Duterte ang nahimong inspirasyon sa maong grupo nga pakusgan ang kampanya alang sa pagpasabot sa mga Pilipino sa kasaysayan sa nasud.
Dugang pa ni Ignacio nga si Presidente Digong maoy una nga nakita ug nadungog nila nga kandidato kaniadto nga nagatudlo og kasaysayan samtang nagakampanya.
Kahinumdoman nga sa matag kampanya niadtong 2016 ni PRRD magsugod kini sa pagpasabot sa kasaysayan sa Mindanao labi na ang giyera ug kagubot sa isla.
Ang identity crisis sa mga Pilipino ang usa sab sa mga nabantayan ni Ignacio na posible kunong tungod sa grabeng pagsulod sa mga programa sa telebisiyon ug sa mga social media sa mga foreign kun langyaw nga mga salida, kanta ug mga tradisiyon.
Sama na lang sa mga ginahimo karon sa mga Pinoy nga pagpagupit, pag-make up, apil na pag-istorya sama sa mga Koryano.
“Pilipino tayo eh, may sarili tayong itsura, may sarili tayong wika, kulay at tradisiyon. Bakit mo kailangang mag-mukhang Koryano, magsalita ng Koryano at mag-aral ng kultura ng Koryano, eh nasa Pilipinas ka naman,” butyag ni Ignacio sa pakighinabi sa media. (PR)