MGA pulis sa usa ka checkpoint nga ningdawat sa gitunol nga sandwich ni Cebu City Councilor Margot Osmeña atol sa Semana Santa wa parelibohi sa katungdanan, apan gitahasan silag laing trabaho.
Matod ni Police Colonel Royina Garma nga igo lang sila nga gipa return to barracks.
Wa na sila gipalusad og Commission on Elections (Comelec) checkpoint.
Una nang nakasaway si Police Regional Director Brigadier General Debold Sinas sa pagdawat sa maong mga pulis sa gihatag ni Osmeña nga usa ka pulitiko tungod kay panahon karon sa election.
Kinahanglan nga ang mga pulis moobserbar sa delicadeza, matod ni Sinas.
Gipanalipdan ni Garma ang gihimo sa iyang mga pulis nga nibutang og checkpoint sa gawas sa balay sa mayor sanglit adunay pagtugot sa Comelec.
Iyang gipasabot nga di pag pang harass ang gihimo sa mga pulis tungod kay nagtuman lang sila sa ilang mandato samtang nagkaduol na ang eleksyon.
“May clearance kami sa Comelec. Everytime may checkpoint kami kasi, hindi kami pwede mag checkpoint kung hindi approved ng Comelec. Isa lang ito sa activities namin sa crime prevention,” matod ni Garma.
Ang tumong sa Comelec checkpoint, matod ni Garma, mao ang pagpugong sa loose firearms.
Sunod semana mas hingusgan pa sa kapulisan ang Oplan Katok sa mga panimay nga adunay nga armas nga mi expired na ang lisensya.
Sa ilang listahan adunay kapin sa 4,000 ka mga tawo ang wa ma renew ang ilang lisensya nga angay i-surrender sa police station ang armas. (AYB)