Paghatag sa fuel subsidy cards gisuspenso sa LTFRB

TEMPORARYO nga gihunong sa Land Transportation Franchising and Regulatory Board (LTFRB) sa Central Visayas ang pag-apud-apod sa mga fuel subsidy card ngadto sa mga operator og public utility jeepneys (PUJ).

Si LTFRB 7 Director Eduardo Montealto Jr. niingon nga nangayo og clearance ang Land Bank of the Philippines (LBP) sa Commission on Elections (Comelec) kon apil ba sa election ban ang distribusyon sa Pantawid Pasada Program (PPP) cards.

Dili sila gusto nga magamit sa mga pulitiko ang pagpanghatag og PPP cards sa mga operator ug drayber.

“After election na seguro ni ipanghatag. Kay siyempre kon ipanghatag ni nimo karon, daghan mga pulitiko ang mosakay,” sumala sa director sa pakighinabi sa Superbalita Cebu niadtong Biyernes, Abril 26.

Niadtong Marso 28, naabot na ang dugang 5,000 ka PPP cards gikan sa ulohang buhatan sa LTFRB. Kini ang ikaduhang batch.

Sa unang batch, 5,354 ka cards ang nadawat sa LTFRB 7 niadtong Agusto sa miaging tuig. (SCG)