WALAY respeto sa buhatan sa Commission on Elections ang pag-isnab ug ora-oradang pagbalibad sa Team Unity atol sa Provincial Candidates Forum nga gi-organisa sa Provincial Comelec pangulohan ni abogado Aleli Ramirez.
Present ang partido PaDayon Pilipino sa pagpangulo ni Governor Bambi Emano, vice gubernatorial candidate Prexy Elipe ug congressional Candidate Benjo Benaldo.
Apan giingong mibalibad ora-orada ang Team Unity ubos nila ni Congresswoman Juliette Uy, gubernatorial candidate Julio Uy, congressional candidate Joey Pelaez ug magpapili pagka bise gobernador, Jigjag Pelaez.
Nakahatag reaksyon ang pipila ka mga PaDayon Pilipino candidate tungod kay daw aduna unta silay hand shaking sa lungsod sa Opol ug campaign rally niadtong adlawa sa El Salvador City apan mas giprayoridad kini kay dako ilang pagrespeto sa katawhan ug labina sa imbitasyon sa Comelec.
Nakahatag reaksyun si Governor Bambi sa wala pagtungha sa iyang kaatbang.
"Wala naman lang nila tagai og respeto ang Comelec, ang ilang wala pagtunga ug nagsaad sila nga moanhi pagpakita siguro nga gakahadlok ug wala silay igong ebidensya ipakita ug kapasikaran sa ilang tumo tumo batok kanako," matud ni Governor Bambi ug miingon nga makatabang kini sa ilang kandidato.
Dugang niini nga andam gihapon silang mo-atubang kun aduna pay laing forum basta ila lang maatubang ilang mga kaatbang.
Sa iyang bahin ni Benjo Benaldo kinsa makaatbang si Congresswoman Juliette Uy nakasaway kini sa wala pagtungha sa kongresista.
"Walay respeto ang atong mga kaatbang. Karon unta this is the time nga tubagon sa atong kaatbang ang isyu sama sa pagpangilkil. This is the perfect time to answer the questions namo sa partido. At least man lang unta ilang girespeto mga tao ug ang Comelec," reaksyon ni Benaldo.
Si Prexy Elipe kinsa nagpapili pagka bise gobernador niingon sab nga subo siya kay wala iyang kaatbang nga mao si Jigjag Pelaez.
"Sayang kay it's an oppurtunity unta nga mapadayag ilang opinyon. Daghan ang ilang pagpangatake kay Gov Bambi including personal attacks. We are hoping nga unta they will tell us that to our face ug unta ilang maladlad ilang mga plataporma apan wala gyod sila plano nagpasabot nga kana ilang akusasyon dili nila masustinihan atubangan mismo unta sa Comelec," reaksyon ni Elipe.
Bisan ang laing nagpapili pagka gobernador nga si Manuel Po nagsige og singgit pagpangita ni Julio Uy.
"Asa naman ka Julio Uy nganong wala ka mipakita?" pangutana niini.
Ang kampo ni Uy wala pay reaksyon niini apan giingon nga adunay handshaking nga gihimo ang team sa lungsod sa Manticao ug naapekihan na sa oras.
Bukas gihapon kining mantalaan sa reaksyon sa Team Unity.