Moreno-Uy tandem nag-una sa XU-Kuro survey

GIPAGAWAS na ang resulta sa unang hugna sa independent poll survey nga gipahigayon sa Xavier University - Kinaadman: University Research Office (XU University-KURO) kini gikan lamang niadtong Abril 4 hangtod Abril 11.

Ang maong survey gikuha sa 800 ka mga botante sa usa ka semana sa pagsugod sa kampanya sa lokal.

Nag-una sa pagkamayor mao si Mayor Oscar Moreno, gisundan ni Jose Gabriel "Pompee" La Viña ug sa independente nga mga kandidato nga sila si Felix Borres ug Ben Contreras diin dunay undecided voters nga 21.4 porsyento ug 0.2 porsyento nga walay gihatag nga tubag.

Sa duha ka distrito si Moreno ang gipaborang kandidato nga dunay 65.3 porsyento sa unang distrito ug 58.1 porsyento sa ikaduhang distrito.

Samtang si La Viña dunay 13.2 porsyento sa distrito uno ug 18.5 porsyento sa distrito dos. Samtang sila si Borres ug Tiu nakakuha og dili motaas sa uno porsyento sa matag distrito. Samtang dunay 20.4 porsyento sa unang distrito ug 22.3 porsyento sa ikaduhang distrito nga wala pa makadesisyon.

Samtang sa pagkabise mayor nakakuha og pabor gikan sa mga botante si Vice Mayor Rainier Joaquin "Kikang" Uy kinsa running mate ni Moreno sa 55.0 porsyento gisundan usab sa kaatbang nga si kanhi mayor Vicente Emano sa 23.6 porsyento ug duna pay 21.3 porsyento nga wala pa makadesisyon.

Sa distrito uno usab sa pagka kongresista nag-una usab ang kasamtangang kongresista nga si Rolando Uy sa (PDP-Laban) nga dunay 66.1 porsyento gisundan ni Caesar Ian Acenas (PDP-Laban) sa 16.4 porsyento ug Gil Banaag nga 1.9 porsyento samtang 15.6 porsyento pa ang undecided.

Mas nakakuha usab og suporta sa katawhan sa distrito dos mao si Rufus Rodriguez nga dunay 59.2 porsyento, nga gisundan ni Yan Lam "Alam" Lim sa 19.4 porysento ug Roger Villazorda nga 0.9 porsyento. Samtang 15.9 porsyento usab ang undecided ug 3.1 porsyento ang walay tubag.

Mas dominante usab ang anaa ubos sa kasamtangang administrasiyon sa siyudad sa Cagayan de Oro ug partido PDP-Laban ang nisakay alang sa pagkonsehal diin anaa sa walo ang gikan sa PDP-Laban, upat sa Padayon Pilipino ug usa sa Partido Federal ng Pilipinas.

Sa unang distrito sa gipahigayong survey sa XU-KURO kini usab ang mga kandidato sa pagkakonsehal ang posibleng makasulod bisan kinsa kanila diha sa number 1 hangtod sa number 7 rank mao sila si Roger Abaday (PDP-Laban), Romeo Calizo (PDP-Laban), Dok Boboy Daba (PDP-Laban), Inday Dahino (PDP-Laban), George Goking (PDP-Laban), Zaldy Ocon (PDP-Laban) ug Jay Pascual (PDP-Laban).

Samtang sa number 8 hangtud 13th spots mao sila si Jose Pepe Abbu (Padayon Pilipino), Ronald Acenas (Padayon Pilipino), Alden Bacal (Padayon Pilipino), Jundabs Daba (PDP-Laban), Manny Darimbang (PFP) ug Lordan Suan (Padayon Pilipino).

Sa ikaduhang distrito mas daghan usab ang gipili sa katawhan nga gikan sa PDP-Laban diin anaa sa pito, upat sa Padayon Pilipino ug duha gikan sa Centrist Democratic Party (CDP).

Sila si Jun Acenas (Padayon Pilipino), Edgar Cabanlas (PDP-Laban), Malou Gaane (PDP-Laban), Bong Lao (PDP-Laban), Ian Mark Nacaya (PDP-Laban), Eric Salcedo (PDP-Laban) ug Ramon Tabor (Padayon Pilipino) ang posibleng makasulod ang bisan kinsa kanila diha sa number 1 hangtud number 7 nga ranking.

Samtang sa number 8 hangtud number 13 posibleng makuha usab sa bisan kinsa nila ni Girlie Balaba (PDP-Laban), Suzette Daba (PDP-Laban), Alexander Dacer (Padayon Pilipino), Leon Can Jr. (Padayon Pilipino), James Judith (CDP) ug Bebot Rodriguez (CDP).

Gibutyag ni Dr. Astrid Sinco, deputy director sa KURO ug project leader sa poll survey nga kini pa ang unang hugna sa poll survey nga ilang gihimo ug duna pay ikaduhang hugna ug ipagawas kini diha sa duol na ang adlaw sa mismong eleksiyon.

Gipasalig usab sa tinugyanan sa XU-KURO nga independente ang gihimong poll survey ug giingong kini nga kalihukan isip pagtamod sa adbokasiya alang sa clean, honest, accurate, meaningful, ug peaceful (CHAMP) nga eleksiyon.

“Wala mi bias kay naa man mi landmark, naa man mi mga criteria naa mi interval, usa gyud sa criteria nga dili ka pwedi mo-apil sa survey kung dili ka botante sa Cagayan de Oro ug dili ka legal nga edad,” matud ni Sinco.

Giingong anaa sa 95 porsyento ang confidence level ang maong survey gani niadtong 2016 sakto ang maong mga resulta sa survey gawas sa usa diin dunay wala naapil sa winning circle apan nakadaog.

“2016 nga poll survey and what we have mentioned a while ago we have a high success rate as 2016 nga election, ikaduha na ni nga massive and dako gyud kaayo gasto ang Xavier University election budget,” dugang niini.

Anaa usab sa 15 ka mga enumerators kinsa giingong mga professional ang nagpahigayon sa maong pagsurvey diin nangadto sa mga panimalay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph