TUNGOD sa cellular phone nga gibalikan sulod sa panimay, maoy hinungdan nga nalakip sa pagkasunog ang 66-anyos nga inahan, kinsa giila nga si Lilian Intrampas.

Matud sa mga silingan niini ug sa iyang niludhan sa kasal, nga natulog ang biktima sa dihang niulbo ang sunog sa silingang panimay, diha sa Sitio Silangan sa Barangay Tejero, Dakbayan sa Sugbo.

Gidali kini pagpukaw sa usa sa mga anak, aron pagsiguro nga luwas kini, bisan kon sinena nga tapot lawas lang ang dala.

Apan giingon nga bisan kon 100 metros na kini kalayo sa ilang panimay nibalik kini sa ilang balay sa dihang nahinumduman ang iyang cellphone.

“Gipugngan man unta siya ni Ate Bebing, wala man gyud nagpapugong, nibalik gyud siya sa balay. Basin nisuway unta siya og guba sa ilang comfort room (C.R.) kay light material ra lage, kay ang kayo naa man diha na sa ilang atubangan, sa iyang agi-anan, mao siguro didto na siya sa C.R. na-trap,” saysay ni Yrayda Calicace, silingan sa biktima.

“Nangaratol naman gud ang tanan, tua na gud ta sya sa may poste, layo na, nya nibalik pa gyud kay nawili sa butang. Wala na gyud siya napugngan,” dugang ni Roger Andos.

Dungan sa pagbangutan sa pamilya ug sa mga silingan, ang panawagan usab nila og tabang, ilabi na alang sa tubig nga mainum tungod sa grabe nga kainit sa panahon.

Mga trapal aron temporaryo nga panangga gikan sa init o sa kalit unya nga pag-ulan, kay kasagaran sa ilang mga lalaki ang mas nipili nga diha lang mo-estar sa lugar diin nasunog ang ilang panimay.

Ang kasagaran hinuon sa mga biktima sa sunog, ilabi na mga bata, ang anaa sa Tejero Sports complex.

Gibana-bana nga dul-an sa 300 ka pamilya ang nabiktima sa sunog, sa dul-an 90 ka mga panimay nga naugdaw, atol sa pag-igo sa sunog niadtong Byernes sa hapon, Abril 26.