CEBU City Police Office director, Police Colonel Royina Garma, gipasanginlan sa kapuyo ni Eddie Basillote nga nanghulga nga patyon ang pamilya kon mopadayon og kaso batok sa mga pulis.
Apan Garma, nihimakak sa maong pasangil, gani nibahad kini nga posibleng mopasaka og kaso batok sa maong kapuyo.
Kahinumduman nga nag-viral sa social media ang gi-upload nga kuha sa closed-circuit television (CCTV) footage diin unom ka mga lalaki nga nagdala og mga armas, ang nangulata sa giingong gidakop nga lalaki nga giila og Eddie Basillote, 28-anyos, niadtong Huwebes Santo sa gabii, Abril 18.
Ang kapuyo niini, kinsa nagdumili nga magpahingalan, ang nagpa-interview sa mga tigbalita, Domingo sa hapon, Abril 28 diha sulod sa panimalay sa Ponce 2, Barangay Carreta, nitug-an nga gikulata una gidakop ang iyang bana.
Ang mga lalaki nga nakitang adunay mga armas ug nangulata giingong mga pulis nga na-assign sa Talamban police station.
Una nga gitanggong ug na-blotter sa Talamban Police Station si Basillote sa buy-bust operation.
Matud sa kapuyo nga niduaw siya ala una sa hapon niadtong Sabado, Abril 27, sa iyang bana kinsa gibalhin na og priso sa Cebu City Police Office detention cell.
Matud niya nga nakig-estorya kaniya ang iyang bana kalabot sa giingon nga hulga sa director.
“Ang ako, nay gi-istorya ang akong bana sa ako, nihatud ko gahapon og kaon, naa siya gi-istorya nako nga si Garma, ni- psywar (psychological warfare) sa iya, pamatyon kuno mi, asta ang akong mga anak, asta mga ig-agaw sa akong bana. Pamatyon kuno ming tanan, ug dili ipa-delete ang mga video ug padayon kuno namu ang kaso,” alegasyon sa kapuyo ni Basillote.
Matud sa 24-anyos nga babaye nga nahadlok man sila sa hulga, apan magpadayon ang ilang pagpasaka og kaso sa unom ka mga giila nila nga mga pulis nga nikulata kang Basillote.
Kon mohimo og pakisusi ang Commission on Human Rights, andam sila nga makig-alayon.
Hangyo niini kang Garma, “Ang akong ika-storya ni Garma, nga dili sad mi niya ingon-anaon kay pobre mi, wala mi ikasukol niya, dili mi niya pamatyon kay pobre mi, tan-awon sa niya ang video ba unsay sakto, ayaw lang intawn mi hilabti."
Giangkon sa babaye nga namaligya og ilegal nga drugas si Basillote, apan kaniadto lang, ug giingong dugay na nga niundang, niadtong pagkapili pagka-presidente sa nasud ni Rodrigo Duterte.
Matud sa kapuyo nga kon dakpon man si Basillote, dakpon lang ug dili na kinahanglan pa nga kulatahon.
Sa iyang bahin, hugtanon nga gilimod kini ni Garma, kinsa nitug-an nga wala siyay oras nga mohimo sa ingon.
“Sa tingin mo kailangan i-threat yan o gawin? Bahala sila kung ano ang sabihin nila, it’s a desperate move, kung may mangyari sa kanila, kasalanan ko pa? I will not waste my time," padayag sa director sa CCPO.
Dugang ni Garma nga nabutang karon sa peligro ang kinabuhi sa walo niya ka mga pulis human mapublish ang mga pangalan niini sa social media.
Bahad sa director nga kun padayunon sa kapuyo ang pagpamasangil nga giingong walay basehan, matud ni Garma nga tun-an nila ang posibilidad nga mopasaka og kaso.
Lakip na sa gitun-an nga pasakaan og kaso mao si Cebu City Mayor Tomas Osmeña tungod sa gipost niini sa social media nga daw usa sa walo ka mga pulis ang protector sa usa ka drug personality sa Pulang Bato.
Matud ni Garma nga naay uban diha nga politiko nga miangkon na nga midawat sa P20 million gikan sa napatay nga drug lord nga si Jeffrey "Jaguar" Diaz sa nakalabay nga mga eleksiyon.
“Ay lahat sinabe, eh yung iba dyan tumatanggap sa election, umamin pa nga na tumanggap ng 20 million kay Jaguar, yun dapat tinitingnan ng mga tao, they should stop throwing isyu sa amoa kay kung ako nagsalita mas malala ang isyu naming ibalik," dugang ni Garma.