DAKONG garbo sa mga Dabawenyo nga sa Dakbayan sa Davao gilusad ang prestihiyoso ug grandiyuso nga Palarong Pambansa 2019.
Sumala sa kadagkoan sa Department of Education (DepEd)-Davao Region nga garbo sa Dabawenyo ang mga makadasig nga pasalamat, pagdayeg ug pagbilib sa mga delegado gikan sa mga rehiyon sa nasud sa ilang nakita nga kahan-ay ug kanindot sa mga pasilidad.
Mismong si DepEd Secretary Leonor Briones mibilib sa pasilidad sa Davao City ug misalig sa seguridad sa mga atleta gumikan nakita niini ang daghang pulis ug mga sundalo nga nagbantay sa palibot.
Atol sa opening ceremony kagahapon didto sa hawanan sa University of the Philippines (UP-Mindanao), Barangay Bago Oshiro, Mintal, makita ang mga delegado nga nakasuot sa kolor sa ilang girepresenta nga rehiyon.
Milanog sab ang mensahe sa dakbayan sa Davao sa panguna sa halandong Mayor Sara Duterte-Carpio kinsa nagpasalig sa kaluwasan sa mga delegado samtang naa sa dakbayan ug nagpasalamat sa mainiton nilang paghangop sa Davao City.
Wa paulahi ang mga delegado sa Davao Region kinsa garbo nga mirampa sa hawanan sa UP-Mindanao nga pulos nakasuot og kolor maroon.
Sa seguridad, sumala ni Police Regional Office (PRO)-Davao Region director Brigadier General Marcelo Morales nga daan nang giandam ang mga pulis sa rehiyon aron magbantay sa palibot sa UP-Mindanao ug sa mga kuwarter sa mga atleta.
"Pagtulungan nating itawid itong napakalaking event ng maayos at mapayapa. Isa itong malaking karangalan at dito napiling ganapin sa ating lungsod. Ito ay nagpapatunay lamang na malaki ang tiwala nila sa mga security forces ng Davao Region at huwag natin silang bibiguin kaya hinihingi ko ang suporta at kooperasyon ninyong lahat," sulti ni Morales.
Naka-istambay ang 4,000 participating units gikan sa Security, Safety and Emergency Preparedness Response components sama sa PRO-Davao Region, DCPO, TF Davao, Regional Mobile Force Battalion (RMFB)-Davao Region, BFP, CIDG-Davao Region, PDEA-Davao Region, Philippine Coast Guard, Central 911, Maritime Group-Davao Region, ug Police Auxiliary diin natigayon na ang sent-off ceremony niini alas 3 sa hapon niadtong Miyerkules, Abril 24 didto sa Davao City Police Office.
Naglibot-libot sab ang mga pulis sa mga billeting quarters ug sa mga playing venue aron maseguro ang zero incident rate sa maong national meet.
Karong adlawa, sugdan na ang mga dula nga molungtad sa Mayo 5, 2019.