SULOD niining mga adlawa nia kita sa pagtimbang-timbang sa daghang kandidato ma-lokal man ug nasyunal, kun kinsa ba gayud kanila ang atong pilion bag-o man, o magpasubli.
Ayuha gyud sa pagpili, susiha pag-ayo kung angayan ba silang pilion o sublian niadtong nangatungdanan na, alang sa pagpili og mga kandidato sa pagka-senador, dunay bag-o, dunay nagpasubli, ayaw pagpahaylo sa ilang political advertisement sa telebisyon nga wala gyuy kapuslanan.
Dunay kandidato pagka-senador nga matud pa niya, “Gusto ko happy ka” pero, ang tinuod siya ra ang happy sa ilang Priority Development Assistance Fund (PDAF) ug nia pa’y usa nga matud pa niya “Tuloy ang Laban” unsa kaha nga laban? Nia pa’y lain, ingon niya, “Mabait sa totoo, galit sa manloloko”.
High-tech na kita karon, aduna na kita’y tagsa-tagsa ka android cellphone, puwede nato ma-search kung duna ba gyud ni sila'y mga balaudnon nga napasa ug nahimong balaud nga sila ang principal author.
Dapat ang unod unta sa ilang political advertisement ang mga balaod nga ilang napanday sa ilang pagka-senador.
Karon, nia po’y mga bag-ong kandidato sa pagka-senador, pero ang puhonan mao ang pagpunay og panaway, atake sa administrasyong Duterte ug dili gyud ka ganahan nga maminaw, tungod kay kitang mga lungsuranon ang labaw’ng nasayud kun unsay nahimo niining administrasyuna.
Karon ari kita sa mga lokal nga pili-onon, numero unong isyu, political dynasty, dinhi sa atong Dakbayan sa Davao ang mayor Duterte, ang bise Duterte, ug ang congressman Duterte.
Didto sa Davao del Sur, ang gobernador Cagas, ang bise Cagas, ang congresswoman Cagas, ang kandidato sa pagka-mayor Cagas gihapon. Didto usab sa Davao del Norte ang kandidato sa pagka gobernador Del Rosario, ug ang congressman Del Rosario.
Ang pinaka-kuyaw didto sa probinsiya sa Surigao del Norte kay gikan sa pagka gobernador Matugas, bise gobernador ang asawa hangtud na sa iyang mga anak ug apo, gi-ukopar ang tanang posisyon sa politika.
Abi ninyo, dili pod nato ni sila mabasol, tungod kay kon atong basahon ang Artiluko 1, State Policies, Section 26 sa atong 1987 Constitution "The State shall guarantee equal access to opportunities for public service, and prohibit political dynasties as may be defined by law.”
Ang problema kay wala kini gi-defined sa atong mga Kongresista, in short, no enabling law, aron unta dinhi manukad kun unsa ang distansiya sa managkadugo o paryente nga puwede na modagan sa bisa'g unsa nga posisyon sa politika.
Katorse ka adlaw nalang eleksiyon na, ang ato nalang himbisan pag-ayo kon duna pa gyud silay nahimo. Sama sa Davao del Sur, ang mga Cagas, walay maka-ingon nga nagpadato sila sa ilang kaugalingong lalawigan sa probinsiya ang milambo ug dili sila, ug inyong makita ang ebidensiya.
Sa Davao del Norte, ang duha palang ka tuig, nahimo dayong bilyonaryo, nagpunay og saway nga wala kuno’y nahimo ang mga del Rosario sulod sa upat ka dekada, pero, dili sila ang maghukom kon dili ang katawhan sa DavNor nga maoy nakabenepisyo sa ilang serbisyo.
Sa Davao City, kontento kaayo ang Dabawenyo sa serbisyo sa mga Duterte sulod sa tulo ka dekada; ug karon nahimo natong president, Rodrigo Duterte.
Isip-isip mga lungsuranon, ayaw kasilaw sa kuwarta ug bugas ha?